Bıyl 7,7 mln sharshy metr turǵyn úı paıdalanýǵa berildi
NUR-SULTAN. QazAqparat – Qurylys jumystarynyń kólemi 11,1 paıyzǵa ósti. Bul týraly Úkimet otyrysynda bıylǵy jeti aıdaǵy áleýmettik-ekonomıkalyq damýdy talqylaý kezinde Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.
«Aǵymdyǵy jyldyń jeti aı ishinde oryndalǵan qurylys jumystarynyń kólemi 11,1%-ǵa ósip, qurylys sektory joǵary qarqyn kórsetýde. Kórsetkishtiń oń ósimi barlyq óńirler boıynsha tirkelgen. Qurylys-montajdaý jumystarynyń eń joǵary ósýi Túrkistan jáne Mańǵystaý oblystarynda, sondaı-aq Almaty qalasynda baıqaldy», - dedi Á. Erǵalıev.
Onyń aıtýynsha, turǵyn úıdi paıdalanýǵa berý boıynsha da oń dınamıka baıqalýda. Bıylǵy qańtar-shildede 7,7 mln sharshy metr turǵyn úı paıdalanýǵa berildi. Kórsetkishtiń ósýi 10,3%-dy qurady.
«Esepti kezeńde barlyq óńirler oń ósim kórsetti. Eń joǵarǵy ósim Atyraý, Jambyl jáne Shyǵys Qazaqstan oblystarynda baıqaldy», - dedi mınıstr.
Budan buryn habarlanǵandaı, osy jyldyń qańtar-shilde aılarynda Qazaqstan ekonomıkasynyń ósý qarqyny 2,7 paıyzdy qurady.
