Bıyl 7,5 myń jaldamaly páter paıdalanýǵa beriledi - Q.Bıshimbaev
ASTANA. QazAqparat - Bıyl 7,5 myń jaldamaly páter paıdalanýǵa beriledi. Bul týraly búgin Aqordada Elbasy Nursultan Nazarbaevtyń tóraǵalyǵymen ótken QR Úkimetiniń keńeıtilgen otyrysynda «Báıterek» UBH» basqarmasynyń tóraǵasy Qýandyq Bıshimbaev málim etti.
«Aǵymdaǵy jyly jospar boıynsha biz 400 myń sharshy metr baspana tapsyrýymyz qajet, bul 7 myń páter. Biraq, qazirgi ýaqytta jyl sońyna deıin 430 myń sharshy metr, ıaǵnı 30 myń sharshy metrge artyq tapsyratynymyz belgili. Bul shamamen 7,5 myń jaldamaly páter», - dedi Q.Bıshimbaev.
Osy rette Elbasy atalǵan baspanalardyń baǵasy qanshalyqty qoljetimdi ekendigin surady.
«Respýblıka boıynsha qurylystyń ortasha quny sharshy metrine 126 myń teńgeden aınaldy. Bir sharshy metrdi jalǵa alý ortasha 900 teńgeni quraıdy. Eldegi ortasha jalaqy 120 myń teńgeni quraıdy. Biz páterdi eki adamnan turatyn jas otbasyǵa beremiz. Eger olar ortasha eseppen 150-180 myń teńge jalaqy alatyn bolsa, onda 50 sharshy metrdi quraıtyn eki bólmeli páterdi jaldaýǵa shamamen 40 myń teńge jumsaıdy. Bul 20 jyl ishinde óte qoljetimdi. Biz oǵan eshqandaı paıyz qospaımyz, tek ákimshilik operatsııalyq shyǵyndar ǵana alynady», - dedi ol.
Sonymen qatar ol qazirgi ýaqytta 2016 jylǵa arnalǵan 250 myń sharshy metr baspana qurylysy júrgizilip jatqanyn atap ótti.
