Bıyl 7,5 myń oqýshy Altyn belgige úmitker

NUR-SULTAN. QazAqparat – Bıyl elimiz boıynsha 7500 mektep túlegi «Altyn belgi» tósbelgisin alýǵa úmitti. Bul týraly QR Bilim jáne ǵylymı vıtse-mınıstri Sholpan Karınova málim etti, dep habarlaıdy QazAqparat tilshisi.

«Byltyr 9 myńnan astam oqýshy «Altyn belgi» ıegeri atandy. Mınıstrlik bul protsesti qadaǵalaýda ustaıdy. Bıyl elimizde mektep bitiretin túlekterdiń sany 170 myńnan asady. Osy oqýshylardyń arasynda «Altyn belgige» úmitkerler oqý jylynyń basyndaǵy boljaldy derekke sáıkes 12 myńnan asty. Qazirgi aqparatqa sáıkes úmitkerlerdiń sany 7500», - dedi Sholpan Karınova mınıstrlikte ótken efır barysynda.

Sondaı-aq, vıtse-mınıstr úmitkerlerdi «Altyn belgi» emtıhanyna engizilgen ózgeriske qatysty qobaljymaýǵa shaqyrdy.

«Jergilikti bilim bólimi, basqarmasy aýyl, aýdan oqýshylaryn oblys ortalyǵyndaǵy Nazarbaev zııatkerlik mektebine jetkizýdi uıymdastyrýǵa jaýapty. Sol sııaqty oqýshylar aldyn ala NZM-ge baryp, emtıhan tapsyratyn kabınetti kórip, tanysýǵa quqyly», - deıdi ol.

Onyń aıtýynsha, «Altyn belgini» kóbinese elimizdiń iri qalalaryndaǵy mektep túlekteri ıelenip keledi.

Buǵan deıin habarlaǵanymyzdaı, bıyl «Altyn belgi» úmitkerleri emtıhandy jańa talappen tapsyrady.