Bıyl 640 myń gektar alqapqa shegirtke taralýy múmkin - AShM
«Bıyl shegirtke oshaqtaryn anyqtaý úshin GPS navıgatorlardy paıdalana otyryp, 524 avtokólik pen 1230 tekserýshini jumyldyrý arqyly shamamen 38 mln gektar jerdi tekserý josparlanǵan. Sondaı-aq, shekaralas Reseı, Qytaı jáne Ózbekstan memleketterimen birlesken zertteýler júrgizý kózdelgen. Qazirgi ýaqytta elimizdiń ońtústik óńirlerinde tekserý jumystary bastaldy. Kóktemgi tekserý – qystap shyqqan shegirtkelerdiń jaı-kúıin anyqtaýǵa jáne hımııalyq óńdeý júrgizý úshin jaǵdaıdy boljaýǵa múmkindik beredi», - dep atap ótedi komıtetten.
Vedomstvo málimetinshe, bıyl respýblıka boıynsha shegirtke zııankesteriniń 640 myń gektar alqapta taralýy boljanyp otyr. Shegirtkemen kúreske respýblıkalyq bıýdjetten shamamen 2 mıllıard teńge qarastyrylǵan. Bul qarajatqa jetkilikti pestıtsıdter men hımııalyq óńdeý qyzmetteri satyp alyndy. Sonymen qatar, ortalyq qoımada qosymsha pestıtsıdterdiń qajetti qory bar.Óńdeý jumystaryna 183 arnaıy tehnıka (150 jer ústi búrikkishi, 12 ushaq, 13 asa jeńil áýekemeleri jáne 8 birlik aerozoldi gaz generatorlary) tartý josparlanǵan.
Óńirlerde hımııalyq óńdeý shegirtke zııankesteriniń taralý oshaqtary anyqtalýyna qaraı bastalady. Ol úshin QR AShM Agroónerkásiptik keshendegi memlekettik ınspektsııa komıteti oblystyq ákimdiktermen birlesip monıtorıng jáne hımııalyq óńdeý jumystarynyń josparyn bekitken.