Bıyl 63 temirjol vokzalynda jóndeý jumystary júrgiziledi - QTJ
ASTANA. QazAqparat - 2019 jyly Qazaqstanda 63 temirjol vokzalynda jóndeý jumystary júrgiziledi. «Qazaqstan temir joly» UK» AQ «Magıstraldyq jeli dırektsııasy» fılıalynyń vokzal sharýashylyǵy jónindegi dırektor orynbasary Abaı Dosanov málim etti, dep habarlaıdy QazAqparat tilshisi.
«Magıstraldyq jeli dırektsııasy basqarýynda 244 temirjol vokzaly jáne 346 jolaýshylar platformasy bar. 2018 jyly 69 vokzalda aǵymdyq jóndeý jumystary júrgizildi. Astana-1 temirjol vokzalynda barlyq eskalatorlar aýystyryldy», - dedi A. Dosanov.
Onyń sózine qaraǵanda, vokzaldarda múmkindigi shekteýli jandar úshin kedergisiz ótýdi qamtamasyz etý jumystary júrgizilýde. Estý qabileti nashar turǵyndar úshin anyqtama bıýrosynda ındýktsııalyq panel, múgedekter arbasy jańartyldy. Sonymen qatar, atalǵan nysandar pandýstarmen, arnaıy sanıtarlyq jelimen jabdyqtaldy.
«Qazirgi tańda Qaraǵandy vokzalyn qaıta jóndeý jumystary júrgizilýde. Atalǵan vokzaldaǵy jumystar ótken jyly jazda bastalǵan edi. Óndiristik jumystardyń jospary boıynsha jóndeý sharalary bıyldyń sońyna qaraı aıaqtalady. Jalpy, 2019 jyly 63 vokzalda aǵymdaǵy jóndeý júzege asatyn bolady» , - dedi Abaı Dosanov.
Belgili bolǵandaı, bıyl Shymkent vokzaly jóndeý jumystarymen qamtylady.
