Bıyl 6 aıda elimizge 3,1 mln týrıst keldi
ASTANA. QazAqparat – Bıyl qańtar-maýsymda elimizge 3,1 mln týrıst keldi. Bul týraly Týrızm ındýstrııasy komıteti Investıtsııalardy tartý jáne ilgeriletý basqarmasynyń bas sarapshysy Aqmaral Meńlibek aıtty, dep habarlaıdy QazAqparat tilshisi.
«2023 jyldyń alǵashqy jartyjyldyǵynda elimizdegi ornalastyrý oryndary týrısterge 98 mlrd teńgege qyzmet kórsetti. Bul ótken jyldyń sáıkes kezeńimen salystyrǵanda 45 paıyzǵa artyq. Byltyr qańtar-maýsym aralyǵynda elimizdegi ornalastyrý oryndary týrısterge 67 mlrd teńgege qyzmet kórsetken bolatyn. Al pandemııaǵa deıingi kezeńmen salystyrsaq, atalǵan kórsetkish ósimi 2 esege jýyq. Birinshi jartyjyldyqta ornalastyrý oryndarynyń qyzmetin paıdalanǵan týrıster sany 3,1 mln adamǵa jetti. Bul kórsetkish 2022 jyldyń 6 aıymen salystyrǵanda 400 myń týrıstke artyq. Al pandemııaǵa deıingi deńgeıden 1 mln adamǵa kóp»,- dedi Aqmaral Meńlibek Týrızm jáne sport mınıstrliginiń Telegram paraqshasynda jarııalanǵan beınematerıalda.
