Bıyl 6,5 myńnan astam múmkindigi shekteýli adam «Eńbek» baǵdarlamasyna qatysty
«2020 jylǵy qańtar-mamyr aılarynda 6,5 myń múgedektigi bar adam Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasyna qatysqandar quramyna qosyldy. Onyń ishinde turaqty jumys oryndaryna – 2 myńǵa jýyq adam, ýaqytsha jumysqa (áleýmettik jumys oryndary, jastar praktıkasy, qoǵamdyq jumystar) 4,5 myń adam ornalastyryldy», - delingen Eńbek jáne halyqty áleýmettik qorǵaý mınıstrligi málimetinde.
«Eńbek» memlekettik baǵdarlamasy aıasynda 29 adam mıkrokredıt aldy, onyń 24-si jeke isin ashty, 106 adam grant aldy.
Sonymen qatar, «Halyqty jumyspen qamtý týraly» Zańǵa sáıkes, jergilikti atqarýshy organdar eńbek jaǵdaılary aýyr, zııandy, qaýipti jumys oryndaryn esepke almaǵanda, múmkindigi shekteýli adam úshin jumys oryndaryna eki-tórt paıyz mólsherinde kvota belgileý arqyly halyqty jumyspen qamtý salasyndaǵy memlekettik saıasatty iske asyrýdy qamtamasyz etedi.
Zań normalaryn júzege asyrý kezinde Múgedekterge arnalǵan jumys oryndaryn kvotalaý qaǵıdalary bekitildi. 2020 jyldyń 1-toqsanynyń qorytyndysy aıasynda kvota boıynsha 12 myń adamdy jumysqa ornalastyrý belgilengen, onyń ishinde 3 myń múgedek jumysqa ornalastyryldy (2019 jyly – 4 myń, 2018 jyly – 4,9 myń, 2017 jyly – 2,9 myń).
Bıyl respýblıkalyq bıýdjetten kórý, estý qabileti jáne tirek-qımyl apparaty buzylǵan múgedekter úshin 31 arnaıy jumys ornyn qurýǵa 34,3 mln teńge qarastyrylǵan.
Esterińizge sala keteıik, Qazaqstanda 695 myń múgedek turady, onyń ishinde 424 myńy eńbekke qabiletti jasta (61%), 112 myń adam jumys isteıdi.
