Bıyl 560-tan astam jylý qazandyǵy jóndeledi

NUR-SULTAN. QazAqparat - Bıyl 560-tan astam jylý qazandyǵy jóndeledi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Energetıka vıtse-mınıstri Suńǵat Esimhanov málim etti, dep habarlaıdy QazAqparat tilshisi.

Onyń aıtýynsha, 2018-2019 jyldardaǵy kúzgi-qysqy kezeń turaqty ótti. Tutynýshylar elektr jáne jylý energııasymen tolyq kólemde qamtamasyz etildi. 2018 jylǵa belgilengen energııa kásiporyndarynyń negizgi jabdyqtaryn jóndeý jumystary tolyq kólemde oryndaldy. Elektr stansalary boıynsha 8 energoblok, 56 qazandyq jáne 44 týrbına jóndeldi. Sondaı-aq 28,3 myń km elektr berý jelileri men ortalyqtandyrylǵan jylýmen jabdyqtaý aımaǵyndaǵy 508 qazandyqqa jóndeý júrgizildi. Respýblıkanyń birtutas elektr energetıkalyq júıesinde iri tehnologııalyq buzýshylyqtarǵa jol berilgen joq.

"Jylý berý kezeńinde elektr stansalaryndaǵy elektr generatsııasynyń tolyq tómendeýiniń 13 jaǵdaıy tirkeldi. Bul ótken jylǵy deńgeıden eki esege az, olar normatıvtik merzimde qalpyna keltirildi", - dedi ol.

Vıtse-mınıstr dereginshe, elektr stansalarynyń jylý jelileri jumysynyń temperatýralyq kestesin saqtamaýynyń 60 jaǵdaıy tirkeldi. Bul ótken jylǵy deńgeıden 5 jaǵdaıǵa az. Aǵymdaǵy jylǵy mamyrdyń basynda energııa kózderiniń otyn qoımalarynda 3,3 mln tonna kómir jáne 115 myń tonna mazýt jınaqtalǵan. Bul ótken jyldyń deńgeıine sáıkes keledi.

"Júıelik operatormen bekitilgen Birtutas elektr energetıkalyq júıesindegi elektr stansalarynyń negizgi jabdyqtaryn jóndeý kestesine sáıkes bıyl 11 energoblokty, 63 qazandyq, 46 týrbınany jóndeý josparlanǵan. 2109 jyldyń mamyr aıynyń birinshi onkúndiginde 1 energoblok, 9 qazandyq jáne 12 týrbına jumystary aıaqtaldy. Ár túrli jóndeý satylarynda 6 energoblokta, 20 qazandyq pen 7 týrbınada jumystar júrgizilýde", - dedi vıtse-mınıstr.

S.Esimhanovtyń atap ótýinshe, 2019 jyly ortalyqtandyrylǵan jylýmen jabdyqtaý aımaǵynda jylý energııasyn óndirýdi júzege asyratyn 561 qazandyqty jóndeý josparlanǵan.