Bıyl 55 orman órti tirkeldi
NUR-SULTAN. QazAqparat - Elimizde sý tasqyny kezeńi aıaqtalmaı jatyp órt qaýpi kezeńi bastalyp ketti. Bul týraly QazAqparat QR Tótenshe jaǵdaı komıtetine silteme jasap habarlaıdy.
«Órttiń qaýipti kezeńi bastalǵaly beri 55 orman jáne 434 dala massıvteriniń órti tirkeldi. Órttiń jalpy aýdany 19 myń gektardan asady», - delingen TJK-nyń baspasóz habarlamasynda.
Ótken jyldyń osy kezeńimen salystyrǵanda orman órti sany 2,6 ese artty.
«Dala órti Qyzylorda, Túrkistan, Batys Qazaqstan, Qaraǵandy, Almaty jáne Pavlodar oblystarynda boldy. Ótken táýlikte Pavlodar oblysynda eki dala órti boldy», - delingen habarlamada.
14 sáýir kúni túski ýaqytta Pavlodar oblysyndaǵy ormandy alqapta jalpy aýmaǵy 130 ga qurǵaq shóp pen aǵash órtendi. Órttiń saldarynan Ertis ózeniniń alqabynda ornalasqan jeke turǵyn úı aýmaǵyndaǵy 150 sharshy metr aýmaqtaǵy sharýashylyq ǵımarattary qırady. TJ kúshteri men quraldary, jergilikti atqarýshy organdar, Pavlodar orman sharýashylyǵy jáne janýarlar dúnıesin qorǵaý mekemesi, Chernoıar kentindegi órt sóndirý pýnkti, jalpy alǵanda 57 adam men 13 dana tehnıka jumyldyryldy. Zardap shekkender joq jáne eldi mekenderge qaýip tóngen joq. Órttiń shyǵý sebebi anyqtalýda.
«Ekinshi órt Aqqýly aýdanynda boldy. Sharbaqty aýylynan 10 shaqyrymdyq qashyqtyqta jalpy alańy 100 ga qurǵaq shóp órtendi. Órt saldarynan Maraldy orman sharýashylyǵyna tıesili traktor buzyldy. Órt saǵat 22:15-te óshirilgen. Zardap shekkender joq jáne eldi mekenderge qaýip tóngen joq. Olardy joıýǵa tótenshe jaǵdaılar kúshteri men quraldary, Maraldy orman sharýashylyǵy, 26 adamnan jáne 7 tehnıkadan turatyn erikti órt sóndirý brıgadalary tartylǵan», - deıdi baspasóz qyzmeti.
ІІM TJK orman men dalada órt qaýipsizdigin qamtamasyz etý, sonymen qatar profılaktıkalyq jáne reıdtik is-sharalar, turǵyndar, orman jáne sharýa qojalyqtary jumyskerleri arasynda aqparattandyrý jumystaryn únemi júrgizip otyrady.
«Sáýir aıynyń basynan bastap polıtsııamen birlesip ormandy dala massıvteri men demalys aımaqtarynda 101 birlesken reıdótkizildi. Onyń barysynda aýylsharýashylyq alqaptarynda qurǵaq shóptiń baqylaýsyz qulaýy, sabandy jaǵý jáne basqa da órt qaýipsizdigi erejelerin saqtamaý boıynsha 93 adam ákimshilik jaýapkershilikke tartyldy», - deıdi baspasóz qyzmeti.
