Bıyl 53 myń qazaqstandyq tegin zańgerlik keńes aldy - Ádilet mınıstrligi

ASTANA. 17 qazan. QazAqparat - Bıyl 53 myń qazaqstandyq tegin zańgerlik keńes aldy. Bul týraly búgin Astanada «Qazaqstanda halyqtyń osal toptarynyń ádilettilikke qoljetimdiligi» atty konferentsııada QR Ádilet vıtse-mınıstri Dýlat Qusdáýletov málim etti.

«Aǵymdaǵy jyly halyqqa zańgerlik kómek kórsetýge 301 mıllıon teńgeden astam qarajat bólindi. Onyń 216 mıllıony ıgerildi. Osylaısha, 53 myńnan astam qazaqstandyqqa zańgerlik kómek kórsetildi», - dep atap ótti D. Qusdáýletov.

 Onyń sózinshe, «Memlekettik kepildendirilgen zańgerlik kómek týraly» zań jobasy ázirlengen. Ol qazir QR Parlamenti Májilisiniń qaraýynda jatyr.

 «Zań jobasynda zańgerlik kómektiń mańyzdy túrleriniń biri retinde memlekettik organdardyń quqyqtyq aqparattanýyna úlken mán berilgen. Sonymen qatar memlekettik organdardyń bıýdjetinde quqyqtyq nasıhatqa arnaıy qarajat qarastyrylǵan. Osy maqsattarǵa jyl saıyn memlekettik bıýdjetten iri kólemde aqsha bólinip otyrady», - dep túıindedi sózin vıtse-mınıstr.