Bıyl 500 shaqyrym jol aqyly bolady - Úkimet

ASTANA. QazAqparat - 2018 jyly uzaqtyǵy shamamen 500 shaqyrym respýblıkalyq mańyzy bar avtojoldarda aqyly júıe engizý josparlanýda. Bul týraly Qazaqstan Respýblıkasy Úkimetiniń jáne Qazaqstan Respýblıkasy Ulttyq bankiniń ekonomıkalyq saıasattyń 2018 jylǵa arnalǵan negizgi baǵyttary jónindegi málimdemesinde aıtylǵan, dep habarlaıdy QazAqparat.

Búgin Úkimet otyrysynda málimdeme jobasyn tanystyrǵan QR Ulttyq ekonomıka mınıstri Tımýr Súleımenovtiń aıtýynsha, Astana men Almaty aralyǵyndaǵy Ortalyq-Ońtústik jáne Astana men Óskemen aralyǵyndaǵy Ortalyq-Shyǵys dálizideriniń qurylysy jalǵasady.

Shyǵys jáne ońtústik-shyǵys óńirinde týrızmdi jáne Qytaı Halyq Respýblıkasynan taýar aınalymyn ulǵaıtýdy qamtamasyz etetin Almaty-Óskemen, Qalbataý-Maıqapshaǵaı, Úsharal-Dostyq joldary jańǵyrtylady.

«Jańa joldardy sapaly kútip ustaý jáne qolaıly jáne qaýipsiz qozǵalysty qamtamasyz etý maqsatynda 2018 jyly uzaqtyǵy shamamen 500 shaqyrym respýblıkalyq mańyzy bar avtojoldarda aqyly júıe engizý josparlanýda», - dedi mınıstr.

Onyń aıtýynsha, kóliktik aǵymdardy tıimdi basqarý jáne ınfraqurylymnyń odan ári damý qajettiligin anyqtaý maqsatynda tsıfrlyq tehnologııalardy qoldanýmen Intellektýaldyq kóliktik júıeni kezeń-kezeńmen engizý jóninde jospar qabyldanatyn bolady.

Aıta keteıik, Úkimet otyrysynda mınıstrler kabıneti atalǵan málimdemeni biraýyzdan qoldap, qabyldaǵan bolatyn.