Bıyl 500 myń tonnalyq polıpropılen zaýyty iske qosylmaq

NUR-SULTAN. QazAqparat – QR Energetıka mınıstri Bolat Aqsholaqov munaı-gaz hımııasy salasyndaǵy ımportty almastyrý jobalarynyń jaǵdaıy týraly málimet berdi, dep habarlaıdy QazAqparat tilshisi.

«Aǵymdaǵy jyly qýattylyǵy jylyna 500 myń tonna bolatyn polıpropılen óndirý zaýytyn paıdalanýǵa berý josparlanǵan. Sondaı-aq, qýaty jylyna shamamen 1 mln tonna tereftal qyshqyly men polıetılentereftalat, qýaty jylyna 1,25 mln tonna polıetılen zaýytyn jáne qýaty jylyna 189 myń tonna býtadıen óndirý jónindegi jobalaryn iske asyrýǵa nazar aýdarylady», - dedi ol Úkimet otyrysynda.

Aıtýynsha, osy jobalardy iske asyrý Qazaqstan ekonomıkasyna shamamen 10 mlrd dollar ınvestıtsııa tartýǵa múmkindik beredi.

«Aǵymdaǵy jyly «Teńizshevroıl», «Qarashyǵanaq Petrolıým Opereıtıng» jáne «Nort Kaspıan Opereıtıng Kompanı» konsortsıýmdarymen munaı-gaz mashınasyn jasaýdy damytýdyń halyqaralyq ortalyǵy quryldy.

Osy 3 kásiporynnyń taýarlaryn óndirýdi jergiliktendirý arqyly jumys istep turǵan otandyq taýar óndirýshilerdiń múmkindikterin keńeıtý kózdelgen. Bul kásiporyndardyń jyl saıynǵy satyp alý kólemi shamamen 5 trln teńgeni quraıdy», -dedi Bolat Aqsholaqov.

Mınıstrdi jergilikti qamtýdy damytýdyń tikeleı ınvestıtsııalar qory qurylǵanyn eske saldy.

«Shevron» kompanııasy Qazaqstan aldyndaǵy qaıta ınvestıtsııalaý mindettemeleri sheńberinde jergilikti qamtýdy damytýǵa 248,5 mln AQSh dollaryn bólýde.

Investıtsııalar negizinen tehnologııa men IT, bazalyq taýarlar óndirisi jáne munaı-gaz sektoryna arnalǵan jabdyqtardyń jekelegen túrlerin qurastyrý jáne qorshaǵan ortany qorǵaý sııaqty úsh baǵytqa salynady. Qor «Astana» halyqaralyq qarjy ortalyǵynyń alańynda tirkelgen.

Osyndaı bastamalardyń arqasynda biz munaı-gaz salasy úshin taýarlar óndirýge baǵyttalǵan óz júıemizdi qalyptastyrýymyz kerek», - dedi Energetıka mınıstri.