Bıyl 5 myńnan asa talapker Ál-Farabı atyndaǵy QazUÝ-dyń stýdenti atandy
ALMATY. Qyrkúıektiń 17-si. QazAqparat /Erbol Turymbetov/ - Búgin Almatydaǵy Ál-Farabı atyndaǵy Qazaq ulttyq ýnıversıtetiniń Stýdentter saraıynda bıylǵy jyly oqýǵa túskenderdi stýdentter qataryna qabyldaý saltanatty sharasy ótti. Oǵan, birinshi kýrsqa túsken 5 myńnan asa stýdent qatysty,
dep habarlaıdy QazAqparat.
Ýnıversıtet 2010-2011 oqý jylyna 3200 memlekettik bilim grantyn jeńip alyp, bıylǵy jyly qabyldaý naýqanynyń kóshbasshysy atandy. Olardyń qatarynda 700-den asa «Altyn belgi» ıegeri, QazUÝ-dyń iri jobalarynyń biri - «Ál-Farabı» olımpıadasynyń jeńimpazdary, ár túrli halyqaralyq jáne respýblıkalyq olımpıada ıegerleri men 90 rektorlyq grant ıeleri bar. Osy jyly QazUÝ-dyń sport komandasynyń qatary birinshi kýrstar ishinen 10 sport sheberi, 22 chempıon men halyqaralyq jáne respýblıkalyq sport jarystarynyń jeńimpazdarymen tolyqty.
Sonymen qatar, bıyl QazUÝ joǵary oqý oryndary arasynda alǵash ret birinshi kýrstardyń stýdenttik valsin tuńǵysh qolǵa alǵaly otyr. Oǵan qosa, alǵash ret fakýltet dekandarynyń bastaýymen stýdenttik qalashyqtyń ortalyq alańynda Ál-Farabı atyndaǵy QazUÝ fakýltetteriniń sherýin ótkizedi.
Shara barysynda Ál-Farabı atyndaǵy Qazaq ulttyq ýnıversıtetiniń rektory Baqytjan Jumaǵulov stýdenttik bılet, synaq kitapshasy men bilim kiltin tapsyrdy.
Saltanatty keshke Almaty qalasynyń ákimi Ahmetjan Esimov jáne Bostandyq aýdanynyń ákimi Záýresh Amanjolova shaqyrylǵan.
