Bıyl 5 aıda mas kúıde bolǵan júrgizýshilerdiń kinásinen 200 JKO oryn aldy
ASTANA. QazAqparat - QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń málimetterine sáıkes, respýblıka boıynsha 2016 jyldyń 5 aıynda 2015 jyldyń tıisti kezeńimen salystyrǵanda jol-kólik oqıǵasy 3,3 paıyzǵa tómendedi.
Elimizdiń joldarynda 6038 jol-kólik oqıǵasy bolyp, onda 9045 adam zardap shekken, onyń ishinde 731 adam kóz jumdy, al ótken jyldyń osy kezeńinde 6758 jol-kólik oqıǵasy tirkelip, onda 9384 adamnyń densaýlyǵyna zaqym kelgen, sonyń 785-i qaza boldy.
JKO saldarynan 1514 kámeletke tolmaǵan bala jaraqat alyp, olardyń 53-iniń ómiri qıyldy.
Statıstıkalyq kórsetkishterge qaraǵanda, jol apattarynyń sebepteri ózgermeı tur. Jalpy, 90 paıyzdan artyq JKO Jol qozǵalysy erejelerin buzatyn júrgizýshilerdiń kinásinen bolady. Sonymen, olardyń kinásinen 6219 apat jasalǵan, onyń ishinde 200-i alkogoldik jáne esirtkilik mas kúıinde bolǵan júrgizýshilerdiń kinásinen oryn alǵan.
JKO-nyń kóbisi, ıaǵnı 1895 oqıǵa jyldamdyqty arttyrýdan boldy, sonyń saldarynan 309 adam qaza bolyp, 2285-i jaraqattandy.
Bıylǵy jyly qoǵamdyq kóliktiń qatysýymen 431 JKO oryn alyp, onda 27 adam qaza boldy, 572-si jaraqattandy.
Aıta keteıik, «Memlekettik quqyqtyq statıstıka jáne arnaıy esepke alý týraly» Qazaqstan Respýblıkasynyń Zańyna sáıkes, Quqyqtyq statıstıka jáne arnaıy esepke alý jónindegi komıtet adamdardyń ólimine nemese jaraqattanýyna ákep soqqan jol-kólik oqıǵalaryn ǵana esepke alady.
