Bıyl 48 taýarly-sút ferma men et baǵytyndaǵy 8 qus fabrıkasy paıdalanýǵa berildi – AShM
Baspasóz qyzmetiniń málimetterine qaraǵanda, jyl basynda Úkimet otyrysynda QR Aýyl sharýashylyǵy mınıstri Saparhan Omarov Qazaqstannyń birqatar áleýmettik mańyzy bar azyq-túlik ónimderi boıynsha ımportqa táýeldiligi baryn aıtyp, AShM tarapynan ımportty almastyrý jáne sút ónimderi, qus eti, qant, balyq jáne alma óndirisin ulǵaıtý boıynsha ázirlegen josparyn usynǵan bolatyn.
Sútti mal sharýashylyǵy sektorynda ımportty almastyrý úshin QR AShM aldyna jyl saıyn 25 taýarly-sút fermasyn paıdalanýǵa berý týraly mindet qoıǵan.
COVID-19 pandemııasy jaǵdaıynda kásiporyn basshylary taýarly-sút fermalaryn qurý jáne jańǵyrtý úshin barynsha kúsh saldy, al AShM tarapynan qarjylandyrý jáne memlekettik qoldaý ýaqtyly júrgizildi.
2020 jyldyń qorytyndysy boıynsha jalpy sany 16,2 myń bas iri qara maly jáne óndiristik qýaty jylyna 93 myń tonna sút óndiretin 48 ónerkásiptik jáne otbasylyq taýarly-sút fermasyn paıdalanýǵa berdi. Onyń ishinde jalpy mal basy 12,5 myń ІQM jáne óndiristik qýaty jylyna 87,8 myń tonna sút bolatyn 17 ónerkásiptik taýarly-sút fermasy bar.
Nátıjesinde bıylǵy 11 aıda sút óndirý 3,2%-ǵa – 5,6 mln tonnaǵa deıin ulǵaıdy.
Sútti mal sharýashylyǵynyń tıimdiligin arttyrý úshin asyl tuqymdy maldy sýbsıdııalaý qaǵıdalaryna birqatar ózgerister men tolyqtyrýlar engizildi.
Atap aıtqanda, sútti mal sharýashylyǵynda ımporttalǵan asyl tuqymdy analyq mal basyn satyp alý úshin sýbsıdııalaý normatıvteri bir basqa 225-ten 400 myń teńgege deıin, al otandyq mal sharýashylyǵynda bir basqa 150-den 200 myń teńgege deıin ulǵaıdy. Sonymen qatar, sút qunyn arzandatý úshin ony sýbsıdııalaý qarastyrylǵan.
Sondaı-aq, ónerkásiptik taýarly-sút fermalaryn salýǵa jáne otbasylyq sút fermalaryn zamanaýı úlgide jabdyqtaýǵa jumsalǵan shyǵyndardyń bir bóligin óteý boıynsha sýbsıdııalaý qaǵıdalary ózgertildi. Soǵan sáıkes tehnıka men qajetti quraldardy satyp alýǵa, qurylys-montajdaý jumystaryna ketken shyǵyndardyń 25%-y óteletin boldy.
Sút baǵytyndaǵy mal sharýashylyǵyn memlekettik qoldaý sharalaryna qosymsha «QazAgro» UBH» AQ 6% syıaqy mólsherlemesimen 10 jylǵa deıingi merzimde ónerkásiptik taýarly-sút fermalarynyń qurylysyn qarjylandyrý kiredi.
Osy sharalardyń barlyǵy sútti mal sharýashylyǵy men sút ónimderin óndirý salasyndaǵy bıznesti qoldaý bolyp tabylady.
Sondaı-aq, aǵymdaǵy jyly Aýyl sharýashylyǵy mınıstrligi et baǵytyndaǵy qus sharýashylyǵyn damytýda tolaıym tabysqa jetti. Qus etiniń otandyq óndirisin ulǵaıtý jáne qus sharýashylyǵy óniminiń ımporttyq úlesin azaıtý úshin AShM men óńirlik ákimdikter qazirgi zamanǵy jańa óndiris oryndaryn qurý, jumys istep turǵan qus fabrıkalaryn keńeıtý jáne jańǵyrtý jobalaryna barynsha qoldaý kórsetti.
2020 jyldyń qorytyndysy boıynsha jalpy qýaty jylyna 95 myń tonna qus etin óndiretin et baǵytyndaǵy 8 qus fabrıkasy paıdalanýǵa berildi («Makınsk qus fabrıkasynyń 2-kezegi», «Astrahan qus» AEK» JShS qus fabrıkasyn jańǵyrtý, «Otan Green Food» JShS qus fabrıkasyn qurý, «Alataý Qus» JShS qus fabrıkasyn keńeıtý, «Naýryz Agro LTD» JShS qus fabrıkasyn keńeıtý, «Rıvan» JShS qus fabrıkasyn qurý, «Poltry-Agro» JShS qus fabrıkasyn jańǵyrtý, «Shymkent qus» JShS qus fabrıkasyn jańǵyrtý jobalary).
Bul jobalar 2021 jyldyń birinshi jartyjyldyǵynda tolyq qýatynda jumys isteıdi dep kútilýde.