Bıyl 452 jol apatyn alkogoldik nemese esirtkilik masaıǵan kúıinde bolǵan júrgizýshiler jasady
ASTANA. QazAqparat - QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń málimetine sáıkes, respýblıka boıynsha 2015 jyldyń 9 aıynda 2014 jyldyń osyndaı kezeńimen salystyrǵanda jol-kólik oqıǵasy 4,5 paıyzǵa tómendegen.
Elimizdiń joldarynda 13 723 jol-kólik oqıǵasy bolyp, onda 19 255 adam zardap shekken, al ótken jyldyń 8 aıynda 14 367 jol-kólik oqıǵasy tirkelip, onda 20 099 adamnyń densaýlyǵyna zaqym kelgen.
«Jol-kólik oqıǵasynyń saldarynan jaraqat alýshylardyń sany da tómendegeni baıqalady, ıaǵnı bıyl 17463 adam jaraqat aldy. JKO saldarynan 3230 kámeletke tolmaǵan balalar jaraqat alyp, olardyń 178-i qaza tapqan», - dep atap ótilgen komıtet málimetinde.
JKO-nyń 30 paıyzy Almaty qalasynda oryn alyp otyr. Ústimizdegi jyly bul aımaqta adamdardyń dene jaraqatyna jáne kisi ólimine alyp kelgen 4083 JKO tirkelgen. Apattylyǵy az Soltústik Qazaqstan oblysy bolyp otyr, onda 192 JKO oryn alǵan.
Statıstıka kórsetip otyrǵandaı, jol apattarynyń sebepteri ózgerissiz qalyp otyr. Burynǵysynsha JKO-nyń 90 paıyzy Jol qozǵalysy erejelerin óreskel buzatyn júrgizýshilerdiń kinásinen oryn alýda. Máselen, júrgizýshilerdiń kinásinen 12 891 jol apaty bolsa, onyń ishinde 452-de júrgizýshi alkogoldik nemese esirtkilik masaıǵan kúıinde bolǵan.
Aıta keteıik, «Memlekettik quqyqtyq statıstıka jáne arnaıy esepke alýlar týraly» QR Zańyna sáıkes, Quqyqtyq statıstıka jáne arnaıy esepke alý jónindegi komıtet adamdardyń qaza bolýyna nemese jaraqattanýyna ákep soqqan jol-kólik oqıǵalaryn ǵana esepke alady.
