Bıyl 45 MVt qýattylyǵy bar Ereımentaý jel parkiniń birinshi kezeńi boıynsha qurylystar bastalmaq
ASTANA. 5 aqpan. QazAqparat - «Samuryq-Energo» AQ bıyl 45 MVt qýattylyǵy bar Ereımentaý jel parkiniń birinshi kezeńi boıynsha qurylysty bastaýdy josparlap otyr.
Bul týraly búgin Úkimet otyrysynda QR Premer-Mınıstriniń orynbasary-Indýstrııa jáne jańa tehnologııalar mınıstri Áset Isekeshev málim etti.
Onyń aıtýynsha, Ereımentaý jel parki turǵysynda jobalaý qujatnamasy kelisilgen. Al Almaty oblysynda Kóksý ózeninde 42 MVt qýattaǵy shaǵyn GES-terdiń, sondaı-aq Shelek dálizinde 51 MVt qýattaǵy jel energetıkasynyń parkiniń qurylystaryn bastaý josparlanyp otyr. Budan bólek, ShQO aýmaǵynda qazaqstandyq-ıspandyq Spain Consulting kásiporny Ulan aýdanynda (24 MVt) jel stansasynyń qurylysyna kirispek.
«Jyl sońyna deıin Qordaı aýdanynda jel parkiniń birinshi kezeńi, Qaraqystaq ózenindegi jáne Tasótkel sý qoımasynda shaǵyn GES-ter paıdalanýǵa berilmek»,-dedi mınıstr.
