Bıyl 4300 qaraǵandylyq baspanaly bolady

QARAǴANDY. QazAqparat - Bıylǵy jyly Qaraǵandy oblysynda «Nurly jer» baǵdarlamasy boıynsha 4 300 páter salý josparlanǵan. Bul týraly oblys ákimdiginde ótken apparat jınalysynda Qurylys, sáýlet jáne qala qurylysy basqarmasynyń basshysy Taıhan Qalmahanov málim etti, dep habarlaıdy QazAqparat.

Aımaq basshysynyń baspasóz qyzmetinen málim etkendeı, 4300 páterdiń 1 722-si búginde paıdalanýǵa berilgen. Jospar boıynsha jyl sońyna deıin «Úsh japyraq» shaǵyn aýdanynda 576 páter tapsyrylýy tıis. Taǵy 1054-i «7-20-25» turǵyn úı baǵdarlamasy boıynsha qoldanysqa engizilmek.

«Bıyl 376 otbasyǵa baspanalar «Baqytty otbasy» baǵdarlamasy boıynsha tapsyrylady. Ol jeńildetilgen ıpotekany jyldyq 2% mólsherlemesimen resimdeýdi kózdeıdi. Sondaı-aq, bıyl jalǵa beriletin 1243 páter paıdalanýǵa beriledi. Onyń ishinde 776 páterdiń kiltteri kópbalaly otbasylarǵa úlestiriledi. 467 páterdi áleýmettik osal toptar sanatyna kiretin azamattar alady. Osylaısha, turǵyn úıge kezekte turǵan kópbalaly otbasylar sany 1464-ten 688-ge deıin qysqarady», - delingen ákimdik aqparatynda.
Málim etilgendeı, bıylǵy jyldyń shilde aıyna deıin 168 kópbalaly otbasy páter aldy. Oblystyq jáne respýblıkalyq bıýdjet esebinen olar úshin turǵyn úı ekinshi deńgeıli naryqtan satyp alyndy. Jyl sońyna deıin taǵy 204 páterdi satyp alý jáne tabys etý josparlanýda.