Bıyl 402 myń sábı dúnıege kelgen

ASTANA. QazAqparat – Jyl basynan beri Qazaqstanda 402 myń náreste dúnıe esigin ashty. Bul týraly QR Densaýlyq saqtaý vıtse-mınıstri Vıacheslav Dýdnık aıtty, dep habarlaıdy QazAqparat tilshisi.

«Memleket basshysy halyqqa joldaýynda baqytty balalyq shaq pen óskeleń urpaqtyń bolashaǵyn qamtý jalpyulttyq mindet ekenin basa aıtty. Bala men ana saýlyǵy bizdiń vedomstvonyń basty mindetteriniń biri. Ózderińiz biletindeı, bıyl elimizde balalar jyly atalyp ótilýde. Qazir Qazaqstanda 6,6 mln-nan astam bala bar. Onyń ishinde 5 jasqa deıingi 2,5 mln bala bar jáne 3,4 mln mektep jasyndaǵy bala. Aıta ketsem, balalarǵa medıtsınalyq kómek mindetti áleýmettik medıtsınalyq saqtandyrý júıesi aıasynda kórsetiledi», - dedi Vıacheslav Dýdnık Ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń málimdeýinshe, elimizde 5690 medıtsınalyq nysan balalarǵa ambýlatorııalyq qyzmet usynady.

«Balalarǵa statsıonarlyq kómek kórsetý maqsatynda oblystarda 13 balalar aýrýhanasy, aýdandarda 204 jáne 10 qalalyq aýrýhana jumys istep tur. Barlyǵy 8 myńnan astam tósek-oryn qarastyrylǵan. Odan bólek, elordada ana men bala ortalyǵy jáne Almatyda pedıatrııa jáne balalar hırýrgııasy ǵylymı ortalyǵy jumys istep tur. Atalǵan ortalyqtar joǵary tehnologııaly jáne zamanýı jabdyqpen qamtylǵan», - deıdi ol.

Sondaı-aq V. Dýdnık elimizdegi týý kórsetkishine qatysty aqparatpen bólisti.

«El aýmaǵynda 249 bosanýǵa arnalǵan uıym bar. Onyń ishinde 39 perınataldy ortalyq jáne 49 balalardy ońaltý ortalyǵy. Bıyl balalarǵa ambýlatorlyq deńgeıde 118 mln konsýltatsııalyq-dıagnostıkalyq qabyldaý júrgizildi. Sol sııaqty jyl basynan beri 402 myń sábı dúnıege keldi», - dedi mınıstr orynbasary.