Bıyl 400-ge jýyq otbasy Túrkistannan eldiń soltústigine qonys aýdardy
Búgingi tańǵa deıin qonys aýdarǵandardyń basym bóligi turǵyn úımen jáne jumyspen qamtylǵan. Óz kásibin ashamyn deýshilerge egin, mal sharýashylyǵymen shuǵyldanýǵa jer telimderi usynylǵan. Sondaı-aq, 2021 jyldyń qańtar-qarasha aralyǵynda Soltústik óńirlerge oblystan 1 745 múshesi bar 385 otbasy qonys aýdardy. Bul týraly brıfıngte Túrkistan oblysy jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva málimdedi.
Aıta keterligi, oblysta «Eńbek» memlekettik baǵdarlamasymen qazirgi tańda naqty 85 942 adam jumyspen qamtý sharalaryna qatysqan.
«2021 jyldyń 1 qarashasy boıynsha 1 872 jańa jumys orny qurylyp, 1 377 adamǵa mindetti zeınetaqy jarnasy aýdarylǵan. Halyqty jumyspen qamtý ortalyǵy arqyly 886 adam joldandy. «Alǵashqy jumys orny» jobasyn iske asyrý maqsatynda qazirgi tańda naqty 225 adam joldama alǵan. Sonymen qatar, «Eńbek» memlekettik baǵdarlamasy sheńberinde múgedektigi bar azamattardy jumyspen qamtý maqsatynda 2 501 adamǵa jumyspen qamtý sharalary kórsetildi», - dedi Ásııa Quralqyzy.
Budan ózge, 2021 jylǵy 1 qarashadaǵy jaǵdaı boıynsha oblysta 41,5 myń otbasyǵa 11,2 mlrd teńge kóleminde ataýly áleýmettik kómek taǵaıyndaldy. Olardyń ishinde eńbekke jaramdy 64 656 adamnyń 47 myńy jumyspen qamtyldy.
