Bıyl 40 top-nysan jekeshelendiriledi - Baqyt Sultanov

ASTANA. QazAqparat - QR Qarjy mınıstri Baqyt Sultanov búgingi Úkimet otyrysynda jekeshelendirý baǵdarlamasynyń alǵashqy toqsandaǵy qorytyndysyn baıandady, dep habarlaıdy QazAqparat tilshisi.

"Birinshi toqsannyń qorytyndysy boıynsha jospardaǵy 40 nysannyń ornyna 45 nysan saýda-sattyqqa shyǵarylyp, olardyń ishinen 20-sy satyldy. Satý baǵasy 19 mlrd teńgeni qurady. 10 nysandy taratý týraly sheshim qabyldandy. Osylaısha, birinshi toqsannyń jospary artyǵymen oryndaldy. Oǵan Qyzylorda oblysy ákimdiginiń, «Aqtóbe», «Jetisý», «Oral», «Soltústik» áleýmettik-kásipkerlik korporatsııalarynyń nysandaryn merziminen buryn saýda-sattyqqa shyǵarý arqyly qol jetkizildi", - dep atap ótti B. Sultanov.

Sonymen birge, mınıstr óz merziminde saýda-sattyqqa shyǵarylmaǵan nysandardy de atap ótti. Mysaly, Astana qalasy ákimdiginiń, «Kaspıı» jáne «Shymkent» áleýmettik-kásipkerlik korporatsııalarynyń 5 nysany saýda-sattyqqa óz merziminde shyǵarylmaǵan.

Top-nysandar boıynsha, mınıstr jalpy jekeshelendirýge jatatyn 71 top-nysannyń búgingi kúnge deıin 13-i satylǵanyn habarlady. Satý baǵasy 95 mlrd teńgeni quraǵan.

"Samuryq-Qazyna» Ulttyq ál-aýqat qorynyń 7 nysanyn bas kompanııanyń quramynda «pakettik» satý týraly sheshim qabyldandy. Birinshi toqsanda top nysandary boıynsha aıtarlyqtaı ózgerister bolǵan joq. Aǵymdaǵy jyly 40-top nysandy satý josparlanyp otyr. Búgingi tańda onyń altaýy saýda-sattyqqa shyǵaryldy. Qalǵan 34 nysan boıynsha satý aldyndaǵy daıyndyq jáne satyp alýshylarmen kelissózder júrgizilýde. Bul top-nysandar ishinde respýblıkalyq menshiktegi 11 nysan bar. Olardyń ekeýi boıynsha keıbir memlekettik organdar tıisti is-sharany ýaqtyly júrgizbeı otyr", - dep atap ótti Qarjy mınıstri.

Onyń aıtýynsha, problemaly uıymdardyń biri - QR Investıtsııalar jáne damý mınıstrligi menshigindegi "Qazgelogııa" AQ.

"Bul nysan boıynsha jekeshelendirý túri jáne sharttary boıynsha pysyqtalǵan usynystar áli kúnge deıin túsken joq. Odan keıin Mádenıet jáne sport mınıstrligi ıeligindegi "Qazsport Invest" AQ. Bul nysanǵa qarasty Almaty qalasyndaǵy Balýan Sholaq atyndaǵy sport saraıyn kommýnaldyq menshikke berýge qatysty sharalar oryndalmaı jatyr. Bul jóninde Memleket basshysynyń tıisti tapsyrmasy bar", - dep óz sózin tolyqtyrdy B. Sultanov.

Otyrys barysynda QR Premer-Mınıstri Baqytjan Saǵyntaev Balýan Sholaq sport kesheni máselesiniń ne sebepti sheshilmeı otyrǵanyn surady.

"Aktsıonerlik qoǵam óz sheshimin qabyldaǵan joq. Eń aldymen olar sheshim qabyldaý kerek. Nysandy tezirek jergilikti menshikke jiberý qajet. Tıisti sharalar áli de júrgizilmegen", - dep jaýap berdi B. Sultanov.

Óz kezeginde Úkimet basshysy mınıstr Arystanbek Muhamedıulyna barlyq máseleni osy aıdyń sońyna deıin sheshýdi júktedi.