Bıyl 40 myń jer telimine ınjenerlik kommýnıkatsııalar tartylady -IDM
ASTANA. QazAqparat - Aǵymdaǵy jyly 40 myń jer ýchaskesine ınjenerlik kommýnıkatsııalar tartylady. Bul týraly búgin Májilistegi «Nurly jer» turǵyn úı qurylysy baǵdarlamasyn iske asyrý barysy» taqyrybynda ótip jatqan dóńgelek ústel barysynda QR Investıtsııalar jáne damý vıtse-mınıstri Qaıyrbek Óskenbaev aıtty, dep habarlaıdy QazAqparat tilshisi.
«Halyqtyń osal toptary úshin satyp alý múmkindiginsiz jalǵa beriletin turǵyn úı qurylysy baǵytyna jyl saıyn respýblıkalyq bıýdjetten 25 mlrd teńge bólinip, aımaqtar arasynda teń úlestiriledi. Atalǵan baǵyt aıasynda 2017 jyly aımaqtarda 5391 páterlik satyp alý múmkindiginsiz jalǵa beriletin turǵyn úı qurylysy bastaldy. Onyń ishinde 2620 páter paıdalanýǵa berildi. Aǵymdaǵy jyly da baǵdarlamanyń bul baǵyty boıynsha 177 myń sharshy metr turǵyn úı salý josparlanǵan. 2018 jyly respýblıkalyq bıýdjetten 26,9 mlrd teńge bólý eskerilgen. 1 mamyrdaǵy jaǵdaı boıynsha, jergilikti atqarýshy organdarǵa 5,4 mlrd teńge aýdarylyp, 5 mlrd teńge nemese 92,5 paıyzy ıgerildi», - dedi vıtse-mınıstr.
Onyń aıtýynsha, jeke turǵyn úı qurylysyn damytý baǵytynda 2017 jyly 70 myńnan astam jer ýchaskelerine ınjenerlik kommýnıkatsııalar tartyldy. 54 myń ýchaske erterek berilse, 16 myń ýchaske jańadan berilip otyr.
«Aǵymdaǵy jyly ınjenerik kommýnıkatsııalarmen shamamen 40 jer ýchaskesi qamtamasyz etiledi. Jeke turǵyn úı qurylysyn damytý aıasynda ilki jobalardy iske asyrý qarastyrylǵan. Іlki joba boıynsha, 14 aımaqta 2416 úı qurylysy boıynsha jumystar bastaldy. Onyń ishinde 2017 jyly 184 úı, oǵan qosa Aqtóbe oblysynda 124 úı, Qostanaı oblysynda 40 úı, Soltústik Qazaqstan oblysynda 20 turǵyn úı paıdalanýǵa berildi. Al qalǵan óńirler boıynsha jobalyq-smetalyq qujattar jáne egjeı-tegjeıli jobalaý josparyn jasaý, jer telimin bólý jáne josparlaý jumystary bastalyp ketti», - dedi ol.
Vıtse-mınıstrdiń sózine qaraǵanda, turǵyn úı jınaqtaý júıesine arnalǵan kredıttik turǵyn úı qurylysyna ákimdikter «Báıterek» holdınginiń baǵaly qaǵazdaryn shyǵarý arqyly qarajat tartady.
«2 jyl saıyn aınalymdaǵy qaıtarylǵan qarajattar 277 mlrd teńgeni quraıtyn bolady. Bul qarajattar aldyńǵy turǵyn úı baǵdarlamalarynyń 3 operatorlaryna bólingen bolatyn. Onyń ishinde 113 mlrd teńge «Báıterek» holdıngine, 97 mlrd teńge «Jyljymaıtyn múlik qoryna», 67 mlrd teńge ákimdikterge tıesili. 2017 jyldyń qorytyndysy boıynsha ákimdikter 570 myń sharshy metr turǵyn úı salyndy», - dedi Q.Óskenbaev.
Foto: ibrus.ru
