Bıyl 4 jańa avtojol jobasy bastalmaq
Bul týraly Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda málim etti.
«2025 jylǵa deıin respýblıkalyq mańyzy bar barlyq avtojoldy qaıta jańartý úshin uzyndyǵy 4,3 myń shaqyrymda jańa jobalar júzege asyrylady. Sondaı-aq, 2021-2025 jyldardy 10 myń shaqyrym avtojol jóndeledi. Bıylǵy jyldyń sońyna deıin biz jalpy uzyndyǵy 607 shaqyrym bolatyn 4 jańa avtojol jobasyn bastaýdy josparlap otyrmyz», - dedi mınıstr.
Onyń biri – Qyzylorda-Jezqazǵan avtojoly. Jalpy uzyndyǵy 427 shaqyrym bolatyn dálizdi kúrdeli jóndeýden ótkizý úshin Azııa damý banki men Eýropa qaıta qurý jáne damý bankiniń qaryzy esebinen memlekettik kepildeme negizinde qarjylandyrý josparlanǵan.
«Jyl sońyna deıin banktermen nesıe kelismderine qol qoıý jáne merdiger uıymdardy anyqtaý kózdelgen. «QazAvtoJol» UK» AQ ekonomıkalyq saraptamadan ótý úshin tehnıka ekonomıkalyq negizdemeni jetildirýde boıynsha jumystar júrgizýde. Sondaı-aq, joba bank tarapynan baǵalanýda», - dedi Beıbit Atamqulov.
Qalǵan jobalarǵa toqtalsaq, Túrkistan qalasynyń Shyǵys aınalma jolyn salý (30 km), Shymkent qalasynyń Ońtústik-batys aınalma jolynyń qurylysy (48 km), Saryaǵash qalasy aınalma jolynyń qurylysy (102 km) josparlanǵan.
Eske salsaq, Indýstrııa jáne ınfraqurylymdyq damý mınıstri atalmysh sharada Qandyaǵash-Maqat baǵytyndaǵy 327 shaqyrym jol bıyl ashylatynyn málim etken bolatyn.
Vedomstvo jol qurylysy maýsymynda bıtým baǵasynyń ósýine jol bermeý máselesin pysyqtap jatyr.
