Bıyl 4 oblystyń shekara mańyndaǵy eldi mekenderinde memlekettik radıo habar tarata bastaıdy

NUR-SULTAN. QazAqparat - Bıyl elimizdiń 4 oblysyndaǵy kórshi memlekettermen shekaralas qonystanǵan eldi mekenderinde memlekettik radıo habar tarata bastaıdy. Bul jaıynda Májilis depýtattarynyń saýalyna oraı QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

Úkimet basshysynyń atap ótýinshe, halyqty otandyq tele-radıo habarlarymen qamtý maqsatynda spýtnık jáne efırlik tsıfrlyq telehabardy engizý jáne damytý boıynsha sharalar qabyldanyp jatyr. Tsırflyq-efırlik televızııa shalǵaıdaǵy jáne halyq az qonystanǵan aýdandardaǵy turǵyndardyń otandyq telearnalardy úzdik sapada kórýine múmkindik beredi. Bul rette balama habar taratýdy óshirip, tsıfrlyq habar taratýǵa kóshý 2018 jyldan beri júzege asyrylyp keledi.

«Eń birinshi bolyp Mańǵystaý, Túrkistan, Jambyl oblystary men Shymkent qalasy tolyqtaı kóshti. Bıyl Almaty, Pavlodar jáne Qostanaı oblystaryn tsıfrlyq habar taratýǵa kóshedi. Bul jumystardy búkil respýblıkada 2021 jyly aıaqtaý josparlanǵan», - dedi Asqar Mamın.

Sonymen qatar ol memlekettik radıo stansalardyń habar taratý aýmaǵyn ulǵaıtý boıynsha jumystardyń júrgizilip jatqandyǵyn atap ótedi.

«Bul rette shekara mańyzdaǵy aýdandarǵa aıryqsha nazar aýdarylady. Búginde Almaty, Ońtústik Qazaqstan jáne Shyǵys Qazaqstan oblystarynyń 12 shekara mańyndaǵy eldi mekenderinde 300 myńnan astam adam memlekettik radıo stansalarmen qamtyldy. Osy jyldyń sońyna deıin Almaty, Túrkistan, Soltústik Qazaqstan jáne Shyǵys Qazaqstan oblystarynyń taǵy shekara mańyndaǵy 5 eldi mekeninde memlekettik radıonyń habar taratýyn iske qosý josparlanǵan», - dedi Asqar Mamın.