Bıyl 37 aýyldyń 46 myńǵa jýyq turǵyny taza aýyz sýmen qamtamasyz etiledi

NUR-SULTAN. QazAqparat - Bıyl 37 aýyldyq eldi mekende jańadan sý qubyrlary salynyp, 46 myńǵa jýyq turǵyny taza aýyz sýmen qamtamasyz etiledi. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Halyqty sapaly aýyz sýmen qamtamasyz etý mınıstrliktiń basym mindetteriniń biri bolyp tabylady. Sý kodeksine sáıkes mınıstrlik eldi mekenderdiń shekarasyna deıin sýmen jabdyqtaý jónindegi fýnktsııalardy júzege asyrady jáne toptyq sý qubyrlaryn salý jáne rekonstrýktsııalaý jónindegi bıýdjettik baǵdarlamanyń ákimshisi bolyp sanalady. Qazirgi ýaqytta respýblıka boıynsha jalpy uzyndyǵy 15,5 myń shaqyrym bolatyn 74 toptyq sý qubyrlary bar. Onyń ishinde respýblıkalyq menshikte 13 myń shaqyrym quraıtyn 37 toptyq sý qubyrlary tirkelgen. Olar jalpy bir mıllıonnan astam adamy bar alty 608 aýyldyq eldi mekendi sapaly aýyz sýmen qamtamasyz etýde», - dedi mınıstr.

Onyń aıtýynsha, 2019-2020 jyldar aralyǵynda tıisti qarjy bólinip, áleýmettik mańyzy bar birqatar toptyq sý qubyrlary boıynsha qurylys jumystary aıaqtalǵan. Atap aıtqanda, 2019 jyly Pavlodar oblysyndaǵy Maı, Belovod jáne Qaraǵandy oblysyndaǵy Jáırem-Qarajal toptyq sý qubyrlary paıdalanýǵa berildi. Al 2020 jyly Almaty oblysyndaǵy Qaskeleń, Qyzylorda oblysyndaǵy Talap jáne Jıdeli, Soltústik Qazaqstan oblysyndaǵy Presnov qubyrynyń ekinshi kezeńi, Batys Qazaqstan oblysyndaǵy Jympıty toptyq sý qubyrlary boıynsha barlyq jumystar aǵymdaǵy jyldyń sońyna deıin aıaqtalyp, paıdalanýǵa beriletin bolady.

«Nátıjesinde buǵan deıin sapaly sýy bolmaǵan 37 aýyldyq eldi meken boıynsha jańadan sý qubyrlary salynyp, 46 myńǵa jýyq turǵyny taza aýyz sýmen qamtamasyz etiledi. Sonymen qosa, bir qala men 39 aýyldyq eldi mekenniń eski sý berý júıesi qaıta jóndeýden ótip, aýyz sýdyń sapasy artady. Óz kezeginde, bul 287 myń turǵyndy qamtıdy», - dedi ol.

Mınıstrdiń dereginshe, bıyl 3 toptyq sý qubyrynyń qurylysy bastaldy.

«Olar - jańadan salynyp jatqan Aqmola oblysyndaǵy Makınsk pen Aqtóbe oblysyndaǵy Janys bı toptyq sý qubyrlary. Jáne Qaraǵandy oblysyndaǵy Esqula toptyq sý qubyrynyń jańa bóligi salynýda. Atalǵan toptyq sý qubyrlary 2021 jyldyń aıaǵyna deıin paıdalanýǵa beriledi. Nátıjesinde 3 aýyldyq eldi mekende turatyn 1,3 myń adam úshin sapaly aýyz sý qoljetimdi bolady. Sonymen qatar, 3 qalany sýmen qamtamasyz etetin qubyrlary jańartylady. ıAǵnı, 94 myń turǵyn úshin beriletin aýyz sýdyń sapasy jaqsarady», - dedi Maǵzum Myrzaǵalıev.