Bıyl 35 bala kópqabatty turǵyn úıdiń terezesinen qulap ketken
NUR-SULTAN. QazAqparat - Osy jyldyń basynan beri elimizde kópqabatty turǵyn úılerdiń terezesinen 35 bala qulap ketti. Bul týraly QR ІІM Tótenshe jaǵdaılar komıtetiniń tóraǵasy Vladımır Bekker aıtty, dep habarlaıdy QazAqparat tilshisi.
«Ótken jyly 111 bala terezeden qulap ketken bolatyn. Sodan keıin biz qurylys komıtetine kishkentaı balalar qulap ketpes úshin plastık terezelerge arnaıy qurylǵy ornatý bastamasymen shyqtyq. Bıyl paıdalanýǵa beriletin jańa úılerdiń terezeleri osyndaı qurylǵylarmen jabdyqtalady», - dedi V.Bekker.
Onyń dereginshe, osy jyldyń 5 aıynda ǵana kóppáterli turǵyn úılerdiń terezesinen 1-8 jas aralyǵyndaǵy 35 bala qulap ketken. Mundaı qaıǵyly oqıǵa Nur-Sultanda - 8, Qaraǵandy oblysynda - 7, Jambyl oblysynda - 3, Pavlodar, BQO, Aqtóbe, Mańǵystaý oblystarynda 2 retten, ShQO, Aqtóbe, Mańǵystaý oblystarynda bir retten oryn alǵan. Mamyr aıynyń ózinde 1-den 6 jasqa deıingi 21 bala terezeden qulaǵan.
Osy oraıda komıtet basshysy terezege arnalǵan qurylǵynyń qandaı bolatynyn BAQ ókilderine kórsetip, páter terezesine ornatyp alýǵa keńes berdi.
«Bul qurylǵy asa qymbat ta emes. Baǵasy óndirýshisine baılanysty 1- 2 myń teńge aralyǵynda. Menińshe, negizgi problema dál osy qurylǵylardyń terezede joqtyǵynda emes, úlkenderdiń nemese ata-analardyń balalardy qaraýsyz qaldyrýynda bolyp tur», - dedi Vladımır Bekker.
