Bıyl 34 áskerı qalashyq abattandyrylatyn bolady

ASTANA. QazAqparat - Qazaqstan Qarýly Kúshteri áskerı qyzmetshileriniń áleýmettik-turmystyq jaǵdaılaryn jaqsartý maqsatynda áskerı qalashyqtardy abattandyrý boıynsha jumystar júrgizilýde. Osy jylǵy josparǵa elimizdiń ár óńiriniń 34 nysanynda ortasha jáne kúrdeli jóndeýdi júzege asyrý engizilgen, dep habarlady QR QM baspasóz qyzmeti.

Qazirgi ýaqytta segiz áskerı qalashyqta, onyń ishinde 44803, 30217 jáne 32363 áskerı bólimderiniń bazasynda asfalt-betondy jabyndy kúrdeli jóndeý bastaldy, taǵy da 26 áskerı qalashyqta joldardy ortasha jóndeý, sondaı-aq 10 nysanda qorshaý qurylysyn ornatý júrgizilýde.

Sonymen qatar, áskerı qalashyqtardan tys turatyn áskerı qyzmetshilerdiń turǵyn úılerin jóndeý jalǵasýda. Búgingi kúni Aqmol kentinde jalpy aýdany 3 390 sharshy metr 42 páterli úı tapsyrylýǵa daıyn, al Aıagóz qalasynda jalpy aýdany 5 790 sharshy metr 90 páterli turǵyn úıdiń jóndeý jumysy jalǵasýda.

Kúrdeli jóndeý aıasynda munda terezeler men esikterdi, jabyndy, ınjenerlik jelilerdi aýystyrý jáne qasbetti jóndeý kózdelgen. Kúrdeli jóndeý qazaqstandyq áskerı qyzmetshilerdi turǵyn úımen qamtamasyz etý júıesiniń bir bóligi bolyp tabylady. Turmystyq jaǵdaıdy jaqsartý maqsatynda daıyn baspana salý jáne satyp alýmen qatar áskerı qyzmetshiler turyp jatqan páterlerdi jóndeý júzege asyrylyp jatyr.