Bıyl 3 oblystaǵy 300 myń turǵyny bar aýdandarǵa radıo jetkiziledi
Bul týraly QR Aqparat jáne kommýnıkatsııalar mınıstrliginiń keńeıtilgen alqa májilisinde QR Aqparat jáne kommýnıkatsııalar mınıstri Dáýren Abaev málim etti, dep habarlaıdy «QazAqparat» HAA tilshisi.
«Strategııalyq mańyzdy máselelerdiń biri - tsıfrlyq efırlik tele-radıo habarlaryn taratý. Búgingi tańda halyqtyń 82 paıyzy qamtylǵan. Bıyl Mańǵystaý men Jambyl oblystaryna tsıfrlyq efırlik tele-radıo habarlaryn taratý júıesin engizýdi josparlap otyrmyz», - deıdi mınıstr.
Onyń aıtýynsha, tsıfrlyq televızııalyq stantsııa qurylysynyń josparly túrde oryndalýyn qadaǵalaý osyǵan jaýapty vıtse-mınıstr men «Zerde» holdıngine tapsyrylady.
«Memlekettik radıohabarlaryn taratýda tıisti jumystardy qajet etedi. «Qazaq radıosyn» 2 mln adam tyńdaı almaı otyr. Al «Shalqar radıosynyń» úni 5 mln turǵynǵa jetpeıdi», - deıdi ol.
Mınıstr atalǵan másele ásirese elimizdiń shekaralyq aımaqtaryna qatysty ekenin atap ótti.
«Bıyl Almaty, Ońtústik Qazaqstan jáne Shyǵys Qazaqstan oblystaryndaǵy 300 myń turǵyny bar shekaralyq aýdandarda ornalasqan 12 eldi mekenge radıo jelisin jetkizýdi josparlap otyrmyz. Bolashaqta bul jumystyń aýqymy keńeıe túsedi», - dedi Dáýren Abaev.
