Bıyl 3 myńǵa jýyq adam arendalyq páterge kire alady

ASTANA. QazAqparat - "Nurly jer" memlekettik baǵdarlamasy aıasynda áleýmettik jaǵynan az qamtylǵan azamattar úshin arendalyq turǵyn úıdi salý josparlanǵan. 

Ol baspana jeke menshikke berilmeıdi, tek jalǵa alýǵa bolady. Bıyl osy sanattaǵy turǵyn úılerdi salýǵa 25 mlrd teńge bólindi, dep xabarlaıdy QazAqparat tilshisi.

QR Investıtsııalar jáne damý mınıstri Jeńis Qasymbektiń aıtýynsha, búginde 25 mlrd teńgeniń 6 mlrd-y aımaqtarǵa aýdaryldy. Aqshanyń qalǵan somasy qarjylandyrý jospary boıynsha beriledi. "Osy ýaqytqa deıin aýdarylǵan aqshaǵa 5 936 páterdiń qurylysy bastaldy. Aǵymdaǵy jylda ol páterlerdiń 2 687-in paıdalanýǵa berý josparlanyp otyr",- dep atap kórsetti Qasymbek Úkimettiń búgingi otyrysynda.

Aıta keteıik, otyrys barysynda mınıstr «Nurly jer» memlekettik baǵdarlamasy boıynsha jarty jyldyń ishinde salynǵan baspananyń sanyn jarııalady. Sondaı-aq , qaı oblysta jer ýchaskeleriniń kóptep beriletinin jetkizdi.Mınıstrdiń aıtýynsha, birqatar aımaqtarda xalyqqa jeńildetilgen ıpoteka berile bastady .