Bıyl 3,2 trln teńgeniń 306 ınvestıtsııalyq jobasy iske asyrylmaq

NUR-SULTAN. QazAqparat – Bıyl elimizde iske asyrylatyn 306 ınvestıtsııalyq jobanyń 40-ynda sheteldik kompanııalardyń qatysy bar, dep habarlaıdy QazAqparat tilshisi.

Búl týraly Úkimet otyrysyn Syrtqy ister mınıstriniń orynbasary Almas Aıdarov aıtty.

«Prezıdenttiń tapsyrmasy boıynsha bıyl sáýir aıynda elimizde iske asyrylyp jatqan ınvestıtsııalyq jobalardyń biryńǵaı pýly jasaldy. Atalǵan pýl toqsan saıyn jańartylyp, ákimdikter men mınıstrlikter saıtynda jarııalandy. Búgingi tańda bul pýl jalpy kólemi 24,4 trln teńgeni quraıtyn 765 jobadan turady jáne 112 myń jańa jumys ornyn qurýdy kózdeıdi», - dedi vıtse-mınıstr.

Onyń aıtýynsha atalǵan jobalardyń kóbi 2025-2026 jylǵa deıingi kezeńdi qamtıdy.

«Bıyl 3,2 trln teńgege 306 joba paıdalanýǵa beriledi dep kútilýde. Onyń ishinde sheteldik kompanııalardyń qatysýymen 40 joba bar. Engiziletin jobalardyń ishinde arab ınvestorlarynyń Nur-Sultan qalasynda kópfýnktsıonaldy keshen salý, Qaraǵandy oblysynda «Tatneft» kompanııasynyń shına zaýytyn salý, Aqtóbe oblysynda 48 MVt jel elektr stansasynyń ekinshi kezeńin júrgizý boıynsha ENY General Electric jobasy, balamaly elektr kózderi boıynsha ShQO, Almaty, Túrkistan, Aqtóbe oblystarynda 5 joba iske asyrylady», - dedi Almas Aıdarov.

Al QR Ulttyq ekonomıka birinshi vıtse-mınıstri Tımýr Jaqsylyqovtyń málimeti boıynsha, Qazaqstan 2026 jylǵa qaraı sheteldik ınvestıtsııa aǵynyn 25,5 mlrd dollarǵa arttyrady.