Bıyl 284 adamǵa qatań sógis jarııalandy - agenttik

NUR-SULTAN. QazAqparat – Bıyl 9 aıda ártúrli tártiptik jaýapkershilikke 889 adam tartyldy. Bul týraly QR Sybaılas jemqorlyqqa qarsy is-qımyl agenttigi 1-shi departamentiniń asa mańyzdy ister jónindegi tergeýshisi Danııar Bıǵaıdarov málim etti, dep habarlaıdy QazAqparat.

«2020 jyldyń 9 aıynda Sybaılas jemqorlyqqa qarsy qyzmet memlekettik organdarǵa qylmystyq quqyq buzýshylyq jasaýǵa jáne basqa da zań buzýshylyqtarǵa yqpal etken mán-jaılardy joıý boıynsha 1 347 usynys engizdi. Qaraý nátıjeleri boıynsha ártúrli tártiptik jaýapkershilikke 889 adam tartyldy. Olardyń 92-si jumystan shyǵaryldy, 94-i qyzmetinen bosatyldy, 83-i qyzmetke tolyq sáıkes emestigi týraly eskertildi, 12-si qyzmetinen tómendetildi, 284-ine qatań sógis jarııalandy», - dedi D. Bıǵaıdarov Facebook paraqshasynda ótken onlaın brıfıngide.

Onyń aıtýynsha, baqylaýdyń joqtyǵy jáne qaramaǵyndaǵylarmen zańdylyqtyń buzylýyna jol bergeni úshin tártiptik jaýapkershilikke túrli býyndaǵy 296 basshy tartyldy. Olardyń 52-si qyzmetinen bosatyldy, 11-i jumystan shyǵaryldy.

«Sybaılas jemqorlyqqa qarsy qyzmettiń basshylyǵy men qyzmetkerleri eńbek ujymdarymen 412 kezdesý ótkizdi, onda 726 usynys qaraldy.Tek osy aptada óńirlerde birqatar usynystar qaraldy», - dedi agenttik ókili.

SQO boıynsha Sybaılas jemqorlyqqa qarsy qyzmetiniń usynysy boıynsha (aýdannyń dene shynyqtyrý-saýyqtyrý keshenderiniń birin salý kezinde bıýdjet qarajatyn urlaý týraly is boıynsha), óziniń laýazymdyq mindetterin tıisinshe oryndamaǵany, «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» QR Zańynyń 73-babynyń 2-bóligin buzǵany úshin «Aqjar aýdanynyń qurylys, sáýlet jáne qala qurylysy bólimi» MM basshysy J.J. Eslıambekov «qatań sógis» túrinde tártiptik jaýapkershilikke tartyldy.

Sonymen qatar, memlekettik qyzmetke kir keltiretin tártiptik teris qylyq úshin «Jambyl oblystyq stomatologııalyq emhanasy» ShJQ KMK bas dárigeri A.B. Úsenbaev «sógis» túrindegi tártiptik jaýapkershilikke tartyldy.