Bıyl 2020-2025 jyldarǵa arnalǵan ındýstrııalandyrý baǵdarlamasy bekitiledi

NUR-SULTAN. QazAqparat - Bıyl jyl sońyna deıin 2020-2025 jyldarǵa arnalǵan ındýstrııalandyrý baǵdarlamasy bekitiledi. Bul týraly búgin Úkimet úıindegi baspasóz máslıhatynda QR Indýstrııa jáne ınfraqurylymdyq damý vıtse-mınıstri Amanııaz Erjanov aıtty, dep habarlaıdy QazAqparat tilshisi.

«Elbasynyń tapsyrmasy boıynsha jyl sońyna deıin 2020-2025 jyldarǵa arnalǵan ındýstrııalandyrý baǵdarlamasyn bekitýimiz kerek. Ózderińizge belgili, bul negizgi tásilder ındýstrııalyq-ınnovatsııalyq damý tujyrymdamasyna engizilgen. Ol ótken jyldyń jeltoqsan aıynda Úkimettiń qaýlysymen bekitildi. Baǵdarlamanyń maqsaty óńdeýshi ónerkásiptiń halyqaralyq básekege qabilettiligin yntalandyrý bolyp tabylady. Tutastaı alǵanda, ındýstrııalyq-ınnovatsııalyq saıasat sabaqtastyqty saqtaıdy jáne eksportqa baǵdarlanǵan kásiporyndar men eńbek ónimdiligin arttyrýǵa basa nazar aýdara otyryp, óńdeý ónerkásibin damytýǵa shoǵyrlandyrylatyn bolady», - dedi vıtse-mınıstr.

Osy rette Amanııaz Erjanov aldaǵy ýaqytta bekitiletin 2020-2025 jyldarǵa arnalǵan ındýstrııalandyrý baǵdarlamasynyń negizgi jańalyqtaryna toqtaldy.

«Birinshi, óńdeýshi ónerkásiptiń barlyq salalaryndaǵy tıimdi óndirýshilerdi qoldaý paıdasyna oraı salalyq basymdyqtardan bas tartamyz. Ekinshi, bıýdjettik resýrstardy paıdalanýǵa baqylaýdy kúsheıtý jáne utymdy paıdalaný maqsatynda kásiporyndardy qoldaý naqty kórsetkishterge qol jetkizý boıynsha bıznestiń qarsy mindettemelerine almasý úshin usynylatyn bolady. Úshinshi, kásiporyndardy jańǵyrtý men tehnologııalyq damytýǵa baǵyttalǵan qoldanystaǵy quraldar jetildiriledi jáne jańa quraldar ázirlenedi", - dedi ol.

Ol qazirgi tańda baǵdarlama jobasy ázirlenip, múddeli memlekettik organdarmen kelisý ústinde ekenin aıtty.