Bıyl 200-den asa jańa mektep salynady - Eraly Toǵjanov
NUR-SULTAN. QazAqparat – Mektepterge qatysty oryn tapshylyǵy 260 myńǵa jetti. Bul týraly Úkimettegi onlaın baspasóz máslıhatynda Premer-Mınıstrdiń orynbasary Eraly Toǵjanov aıtty, dep habarlaıdy QazAqparat tilshisi.
«Memleket basshysy óziniń Joldaýynda áleýmettik salaǵa, ony damytýǵa qatysty birqatar júıeli mindetterdi naqtylap, belgilep bergen bolatyn. Atap aıtqanda, bilim jáne ǵylym salasy boıynsha birinshi mindet - 1 myń jańa mektep qurylysy. Táýelsizdik jyldary elimizde 1900-ge jýyq jańa mektep salyndy. Alaıda demografııalyq ósý qarqynyna baılanysty mektepter tapshylyǵy áli de bar. Eger de búginde oryn tapshylyǵy 260 myń bolsa, 2025 jylǵa deıin ol shamamen 4 esege deıin ulǵaıýy múmkin», - dedi E. Toǵjanov.
Onyń aıtýynsha, jańa mektepter qurylysy barysynda 2 myńnan 4 myńǵa deıin arttyryp, ony jeke sektor esebinen salý eskerilip otyr.
«Jalpy, bıyl keminde 200-den asa jańa mektep salynady. Nátıjesinde, 2025 jylǵa qaraı oryn tapshylyǵyn, sondaı-aq apatty jáne úsh aýysymdy mektepter máselesin tolyqtaı sheshetin bolamyz», - dedi Úkimet basshysynyń orynbasary.
E. Toǵjanov tolyq bilim beretin aýyl mektepterin jan basyna qarjylandyrýǵa kóshý iske asyrylatynyn naqtylady. Qazirgi kezde óńirler arasynda mektepterdi qamtamasyz etýge jumsalatyn qarjy aıyrmashylyǵy aıtarlyqtaı bolyp tur.
