Bıyl 20 myń adam kólik aıdaý quqyǵynan aıyrylǵan

ASTANA. QazAqparat – Jyl basynan beri jol erejesin buzǵandardyń basym bóligi – jyldamdyqty arttyrǵandar. Bul týraly QR ІІM Ákimshilik polıtsııa komıteti tóraǵasynyń orynbasary Jandos Muratálıev aıtty, dep habarlaıdy QazAqparat tilshisi.

«Bıyl 4,5 mln astam jol júrý qaǵıdalaryn buzýdyń joly kesildi. Barlyq ereje buzýdyń 43% belgilengen jyldamdyqty asyrǵandar ekenin atap ótken jón», - dedi Jandos Muratálıev ortalyq kommýnıkatsııalar qyzmetindegi brıfıngte.

Oǵan qosa, 216 myńnan astam jaıaý júrginshige aıyppul salynǵan.

«Kólikti mas kúıinde basqarǵany úshin 18 myńnan astam júrgizýshi ustaldy. 20 myń júrgizýshi kólik aıdaý quqyǵynan aıyryldy, 16 myń adam ákimshilik qamaýǵa alyndy», - dedi spıker.

Buǵan deıin QR ІІM ókili árbir tórtinshi jol apaty jyldamdyq rejımin saqtamaýdan bolatynyn aıtqan edi.

Sonymen birge, jyl basynan beri balalar zardap shekken 2 378 jol-kólik oqıǵasy bolǵan, onda 181 bala qaza taýyp, 2 826 bala jaraqat alǵan.