Bıyl 2 myńnan astam adam jol apatynan mert boldy - ІІM

ASTANA. QazAqparat – Jyl basynan jol apatynan 2 myńnan astam adam mert boldy. Bul týraly QR Іshki ister mınıstrligi baspasóz qyzmetiniń ókili Shuǵyla Turlybek aıtty, dep habarlaıdy QazAqparat tilshisi.

«Jyl basynan beri jol apattary 2 myńnan astam adamnyń ómirin qıdy. Al 15 myńnan astam adam ártúrli dárejede jaraqat aldy. Qarasha aıynda 300-den astam jol-kólik oqıǵasy oryn alyp, 60-qa jýyq adam qaza taýyp, 400-ge jýyq adam jaraqattandy. Eki nemese odan da kóp adamnyń ólimine ákep soqtyrǵan apattar erekshe alańdaýshylyq týǵyzady», - dedi Shuǵyla Turlybek vedomstvonyń baspasóz alańynda ótken brıfıngte.

Onyń dereginshe, osy aıda Jambyl oblysynda jolaýshylar poıyzy Audi 100 avtokóligin soqty.

«Keıin belgili bolǵandaı, kólik júrgizýshisi qaýipsizdikke kóz jetkizbeı temirjol jelisine shyǵyp ketken. Sonyń saldarynan oqıǵa ornynda júrgizýshi men bes jolaýshy qaza tapty. Qostanaı oblysynda Chevrolet júrgizýshisi rólge ıe bola almaı, jol janyndaǵy jyraǵa aýdaryldy. Oqıǵa saldarynan úsheýi qaıtys boldy, bireýi dene jaraqatyn aldy. Qaýipsizdik úshin ІІM barlyǵyn jol erejelerin, ásirese avtomobılder arasyndaǵy qashyqtyqty, búıirlik aralyqty, jyldamdyq rejımin qatań saqtaýǵa, sondaı-aq kenetten tejelis jasaýǵa jáne kilt qozǵalystarǵa jol bermeýge shaqyrady», - dedi ІІM ókili.