Bıyl 2 medıtsınalyq poıyz shalǵaı aýyl turǵyndaryna qyzmet kórsetedi
NUR-SULTAN. QazAqparat - Aǵymdaǵy jyly «Densaýlyq» jáne «Salamatty Qazaqstan» medıtsınalyq poıyzdary shalǵaıdaǵy 220 eldi meken turǵyndaryna qyzmet kórsetedi. Bul jaıynda Májilis depýtattarynyń resmı saýalyna jaýap bergen QR Premer-Mınıstri Asqar Mamın atap ótken, dep habarlaıdy QazAqparat tilshisi.
«Aǵymdaǵy jyly 2 medıtsınalyq poıyzdy («Densaýlyq» jáne «Salamatty Qazaqstan» poıyzdar) shyǵarý josparlanǵan. Medıtsınalyq poıyzdar tómendegideı qyzmetter kórsetedi: beıindi mamandardyń (oftalmolog, otolarıngolog, nevrolog, hırýrg, akýsher-gınekolog, kardıolog, stomatolog, terapevt, mammolog, pedıatr jáne t.b.) qabyldaýy jáne keńesi», - dep atap ótedi Úkimet basshysy.
Asqar Mamınniń jazýynsha, medıtsınalyq poıyzdardyń shamamen 220 eldi mekenge (temir jol stansalaryna) qyzmet kórsetýine qajettilik bar.
«Máselen, 2018 jyly medıtsınalyq poıyzdar 4 aı boıy jumys istedi jáne medıtsınalyq kómekpen 127 eldi meken (temir jol stansasy) qamtamasyz etilip, 38 604 adam tekserýden ótti. 2019 jyly 6 aı boıy 190 eldi mekendi (temir jol stansasyn) qamtyp, keminde 89 myń adamdy medıtsınalyq kómekpen qamtamasyz etý josparlanǵan», - dedi Premer-Mınıstr.
Foto: inbusiness.kz
