Bıyl 2,6 mln aýyl turǵyny medıtsınalyq kómek alady – Alekseı Tsoı

NUR-SULTAN. QazAqparat – Bıyl 2,6 mln aýyl turǵyny medıtsınalyq kómek alady. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«19 sáýirdegi jaǵdaı boıynsha elimizdegi statsıonarlarda 14 147 naýqas em alýda. Onyń ishinde 775 adam nemese 5 paıyzy reanımatsııada aýyr jáne óte aýyr jaǵdaıda jatyr. Jaǵdaıy aýyr naýqastardyń 32 paıyzy Almaty qalasynyń, 13 paıyzy Nur-Sultan qalasynyń, 6 paıyzy Almaty oblysynyń turǵyndary», - dedi mınıstr.

Onyń atap ótýinshe, 2021 jyly jyljymaly medıtsınalyq kesheni elimizdiń 2 myńnan astam shalǵaıda ornalasqan eldi mekenderin aralaıtyn bolady. Osy is-sharanyń arqasynda 2,6 mln turǵyn medıtsınalyq kómekpen qamtylatyndyǵy josparlanǵan.

«Aýyl turǵyndary úshin vaktsınatsııanyń qoljetimdiligin arttyrý maqsatynda vaktsına salý jyljymaly medıtsınalyq keshenderdi qoldaný arqyly uıymdastyrylatyn bolady», - dedi Alekseı Tsoı.