Bıyl 18 myń shaqyrym joldyń sapasy tekseriledi

NUR-SULTAN. QazAqparat – Jol aktıvterin tsıfrlyq basqarý júıesi 2025 jylǵa deıin óńirlerge de engiziledi, dep habarlaıdy QazAqparat tilshisi.

Byltyr respýblıkalyq jáne jergilikti joldardy jóndeý nysandarynda 810 buzýshylyq anyqtaldy Onyń 340-y respýblıkalyq, 470-i jergilikti jelide tirkelgen. Úkimet otyrysynda Indýstrııa jáne ınfraqurylymdyq damý mınıstri Beıbit Atamqulov osyndaı derekter aıtty.

«Jol sapasyn daǵalaýdyń arqasynda merdigerlik uıymdar men tehnıkalyq qadaǵalaý sarapshylary materıaldardyń sapasy men tehnologııanyń saqtalýyna basa nazar aýdara bastady. Bıyl respýblıkalyq jáne jergilikti jeliler boıynsha jol-qurylys jumystary tolyq sapa saraptamasymen qamtylady. Quraldyq tekserý respýblıkalyq jeliniń 18 myń shaqyrymyna júrgiziledi. Onyń qorytyndysy boıynsha jóndeý jónindegi is-sharalar kesheni ázirlenedi», - dedi mınıstr.

Beıbit Atamqulovtyń málimetinshe, jol aktıvterin tsıfrlyq basqarý júıesin daıyndaý jobasy sátti iske asyp jatyr.

«Bul júıe aǵymdaǵy jyly respýblıkalyq jáne 2025 jylǵa deıin jergilikti jelige engizilmek. Sondaı-aq, jyl sońyna deıin 42 salalyq normatıvtik-tehnıkalyq qujat halyqaralyq standart talaptaryna sáıkestendiriledi», - dedi ol.

Eske salsaq, osy Úkimet otyrysynda Beıbit Atamqulov Batys óńirlerdegi ishki joldardyń sapasyn synǵa aldy.

Sondaı-aq, vedomstvo basshysy eldegi aqyly joldardan qansha qarajat túsetinin baıandady.