Bıyl 17 jasqa tolatyn 100 000-nan astam jasóspirim áskerı esepke alynady

ASTANA. 16 qańtar. QazAqparat - Jergilikti áskerı basqarý organdary respýblıkamyzdyń azamattaryn áskerge shaqyrý ýchaskelerine tirkeýdi bastady. «Áskerı qyzmet jáne áskerı qyzmetshilerdiń mártebesi týraly» Qazaqstan Respýblıkasy Zańyna sáıkes, bıyl 1997 jyly týǵan jasóspirimder ásker qataryna shaqyrylý jasyna deıingilerdiń esebine alynatyn bolady.

QR Qorǵanys mınıstrliginiń málimetinshe, jasóspirim jigitter tıisti qorǵanys isteri jónindegi basqarmalar men bólimderde olardyń áskerı qyzmetke jaramdylyq dárejesin anyqtaý maqsatynda medıtsınalyq tekserýden ótedi. Densaýlyqtarynda eleýsiz kemshilikter anyqtalǵan jastarǵa tıisti emdeý mekemelerine joldamalar beriledi. Olar onda áskerge shaqyrylý jasyna deıin densaýlyqtaryn túzete alady.

Sonymen qatar áskerge shaqyrý pýnktterine tirkeý barysynda jastar arasynda áskerı oqý oryndarynda bilim alýǵa nıet bildirgenderge túsindirý, nasıhattaý jumystary júrgiziledi. Barlyǵy 2014 jylǵy qańtar men naýryz aralyǵynda osy jyly 17 jasqa tolatyn 100000-nan asa Qazaqstan Respýblıkasynyń azamaty tirkeýge jatady.

Bul is-sharalar áskerı qyzmetke shaqyrylý jasyna deıingi jastardy ásker qataryna daıyndaýǵa múmkindik beredi.