Bıyl 17 myńǵa jýyq bozbala áskerge alynady
Nur-Sultan qalasynda Qorǵanys mınıstriniń birinshi orynbasary – Qarýly kúshter Bas shtabynyń bastyǵy general-leıtenant Marat Qusaıynovtyń basshylyǵymen azamattardy 2021 jyly merzimdi áskerı qyzmetke shaqyrýdyń qorytyndysy shyǵaryldy.
Atalǵan keńeske Qaýipsizdik keńesiniń, Bas prokýratýranyń, kúshtik qurylymdardyń, ortalyq memlekettik organdardyń ókilderi, ákimderdiń orynbasarlary, densaýlyq saqtaý basqarmalarynyń basshylary, oblystardyń jáne respýblıkalyq mańyzy bar qalalardyń qorǵanys isteri jónindegi departamentteriniń bastyqtary qatysty.
– Áskerı qyzmet – el egemendigin saqtaýdyń negizi. Osyǵan baılanysty, jastardy tárbıeleý jáne olardy Otanyn qorǵaýǵa daıyndaý memleket pen qoǵamnyń mańyzdy mindeti bolmaq, – dep atap ótti general-leıtenant Marat Qusaıynov.
2021 jyly Qarýly kúshterdiń, basqa da áskerler men áskerı quralymdardyń qataryna 32 myńnan astam azamat shaqyryldy.
Bul kúshtik qurylymdardyń bólimshelerin merzimdi qyzmettegi áskerı qyzmetshilerdiń qajetti sanymen jasaqtaýǵa múmkindik berdi.
Áskerge shaqyrylýshylar shaqyrý pýnkterinde jáne áskerı bólimderge kelgennen keıin densaýlyq qaýipsizdigin qamtamasyz etý maqsatynda COVID-19-ǵa PTR-zertteýler júrgizdi. Áskerge shaqyrylýshylar SMS-habarlamalar arqyly málimdendi.
Búginde áskerge shaqyrý jasyndaǵy jastar gadjetterge shamadan tys qumarlyqqa, teńgerimsiz tamaqtanýǵa baılanysty jáne qozǵalystyń azdyǵynan birqatar aýrýlardan zardap shegedi delingen medıtsınalyq komıssııa keltirgen málimetterde.
Alǵashqy medıtsınalyq kýálandyrýdan keıin olar qosymsha tekserýge jiberiledi.
Sonymen qatar, qazirgi ýaqytta kandıdattardy kýálandyrý jumysynyń sapasyn arttyrý maqsatynda Densaýlyq saqtaý mınıstrliginiń aqparattyq júıelerine qol jetkizý máselesi sheshilýde.
Qazaqstan Prezıdenti Qasym-Jomart Toqaevtyń jastardyń merzimdi áskerı qyzmet atqarýǵa yntasyn arttyrý jónindegi tapsyrmasyn iske asyrý sheńberinde Qorǵanys mınıstrligi birqatar usynystar ázirledi.
Olar áskerge shaqyrylýshylar men olardyń otbasy múshelerin áleýmettik qoldaýǵa qatysty bolyp otyr.
Qorǵanys vedomstvosy azamattardyń merzimdi áskerı qyzmet ótkerý kezeńinde olarǵa kredıtter merzimin uzartyp berýdi, bilim berý sektorynda jeńildikter qarastyrýdy, sondaı-aq olardyń otbasy múshelerine kommýnaldyq qyzmetterge aqy tóleý kezinde jeńildikter berýdi usyndy.
Bas shtab bastyǵy áskerlerdi jas sarbazdarmen ýaqytyly jáne sapaly jasaqtaýǵa, áskerge shaqyrý jáne medıtsınalyq komıssııalar jumysynyń sapasyn jaqsartýǵa, sondaı-aq oryn alǵan problemalyq máselelerdi sheshýde birlesip sharalar qabyldaýǵa nazar aýdardy.
Odan ózge, aldaǵy kóktemgi áskerge shaqyrý mindetteri de belgilendi.
Bıyl Qazaqstanda kóktemgi áskerge shaqyrý naýqany 1 naýryzda bastalyp, maýsym aıynyń sońyna deıin jalǵasady.
Osy ýaqyt ishinde Qarýly kúshterdiń, basqa da áskerler men áskerı quralymdardyń qataryn 18-27 jas aralyǵyndaǵy on jeti myńǵa jýyq jasóspirim tolyqtyrady.
