Bıyl 17 bala órtten kóz jumdy
NUR-SULTAN. QazAqparat – Elimizde jyl basynan beri 17 bala órt saldarynan qaza tapty. Bul týraly QR TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov aıtty, dep habarlaıdy QazAqparat tilshisi.
«Sońǵy 3 jyldyń ishinde respýblıka aımaǵynda órt saldarynan 87 bala qaza tapty. Jyl saıyn elimizde balalardyń otpen oınaýy saldarynan shamamen 300 órt oryn alady», - dedi komıtet tóraǵasy Ortalyq kommýnıkatsııalar qyzmetindegi baspasóz máslıhaty barysynda.
Onyń atap ótýinshe, balalar ólim-jitiminiń negizgi sebebi ata-analardyń olardy qaraýsyz qaldyrýy, uıyqtap qalýy, órt kezinde durys is-áreket jasamaýy bolyp otyr.
«Qabyldanǵan is-sharalarǵa qaramastan jyl basynan beri órt saldarynan 17 bala qaza taýyp, taǵy 17 bala jaraqattandy. Iisten ýlaný saldarynan 5 bala qaza taýyp, 84 bala ýlanyp qaldy», - dedi Baýyrjan Syzdyqov.
Komıtet basshysynyń aıtýynsha, balalardyń otpen oınaýy saldarynan týyndaıtyn órtterdiń aldyn alý maqsatynda 1 211 ınteraktıvti sabaq ótkizilip, jas qutqarýshylar jasaqtarymen 19 jarys uıymdastyryldy. Órt-tehnıkalyq ortalyqtarǵa 17 myńnan astam balany qamtyǵan 738 saıahat uıymdastyrylyp, 400-den astam ashyq esik kúnder ótkizildi.
