Bıyl 15 ýnıversıtet tekseriledi - Saıasat Nurbek

ASTANA. QazAqparat – Sapasyz bilim bergen joǵary oqý oryndaryn qatań retteý prıntsıpi qoldanylady. Bul týraly QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

Vedomstvonyń keńeıtilgen alqa májilisinen keıin BAQ ókilderiniń saýalyna jaýap bergen mınıstr joǵary oqý oryndary lıtsenzııasynan tek sottyń sheshimen aıyrylatynyn qadap aıtty.

Al Konstıtýtsııaǵa sáıkes Úkimet te, atqarýshy bılik te sottyń sheshimin ózgerte almaıdy.

«16 joǵary oqý orny lıtsenzııasynan aıyryldy. Bıyl 15 ýnıversıtet tekserýde tur. Alaıda 2023 jyldan bastap joǵary oqý oryndaryn memlekettik baqylaý modeli ózgeredi. Osylaısha, jańa retteý saıasaty engiziledi. Biz bul máseleni muqııat qarastyramyz. Ýnıversıtetti burynǵydaı tez jabýǵa múmkindik bolmaıdy. Sebebi, zańdaǵy prıntsıp ózgeredi. Biraq, bul jumysty jalǵastyramyz. Prezıdent naqty tapsyrmalar berdi. Oǵan qatysty saıasat ózgergen joq. Sapasyz bilim bergen joǵary oqý oryndaryn qatań retteý prıntsıpi qoldanylady», - dedi Saıasat Nurbek.

Aıta keterligi, Ǵylym jáne joǵary bilim mınıstrliginiń málimetinshe, búginde 5 jeke ýnıversıtetke qatysty sot protsesi júrip jatyr.