Bıyl 148 adam óndiristik jaraqattan kóz jumdy
NUR-SULTAN. QazAqparat - Bıyl 1 jeltoqsandaǵy jaǵdaı boıynsha 1215 adam óndiristik jaraqat alyp, onyń 148-i qaza bolǵan. Bul týraly QR Kásipodaqtar federatsııasynyń tóraǵasy Eraly Toǵjanov aıtty, dep habarlaıdy QazAqparat tilshisi.
«Qolymyzdaǵy búgingi málimet boıynsha, 60%-dan astam jaǵdaıda óndiristik jaraqat alýǵa jumys berýshiler kináli bolyp shyqqan. Jalpy, jumys berýshi emes, jumysshynyń ózi kináli jaǵdaılar da bar. Belgilengen tártipti saqtaý kerek», - deıdi Eraly Toǵjanov Ortalyq kommýnıkatsııalar qyzmetinde ótken brıfıngte.
Sondaı-aq, ol búginde kásipodaqtardyń bastamasymen barlyq óńirde «Qaýipsiz eńbek» jergilikti baǵdarlamasy júzege asyrylyp jatqanyn aıtty.
«Osy joba arqyly óndiristik jaraqat alýdyń aldyn alyp, qadaǵalaýdy kúsheıtý kerek. Tehnıkalyq ınspektordan bólek Qoǵamdyq keńester bar. Keı kásiporyndarda Qoǵamdyq keńes qaǵaz júzinde ǵana jumys isteıdi. Qazir sonyń túbine jetip, Qoǵamdyq keńes kerek ekenin jumys berýshilerge túsindirýimiz kerek», - deıdi ol.
Tóraǵanyń aıtýynsha, respýblıka boıynsha kásiporyndarda 15 myń eńbek qaýipsizdigi jáne eńbekti qorǵaý jónindegi óndiristik keńester jumys isteıdi. Olardyń 95%-dan astamy kásipodaqtardyń bastamasymen qurylǵan. Sonymen qatar, 18 810 tehnıkalyq ınspektorlar osy másele boıynsha qoǵamdyq baqylaýdy júzege asyryp jatyr.
