Bıyl 14 myń aýyl turǵyny óz bıznesin bastaýǵa múmkindik alady
ASTANA. QazAqparat - Bıyl 14 myń aýyl turǵyny óz bıznesin bastaýǵa múmkindik alady. Bul týraly búgin Úkimet úıindegi baspasóz máslıhatynda QR Eńbek jáne halyqty áleýmettik qorǵaý vıtse-mınıstri Nurjan Áltaev aıtty, dep habarlaıdy qazAqparat.
«Aýyldyq jerlerde jumyssyz, ózin ózi jumyspen qamtyǵan azamattar, ásirese jastar qazirgi tańda kásipkerlikpen aınalysqysy keledi. Jastar bireýdiń qol astynda emes ózderiniń bıznesin, kásibin, jańa jumys oryndaryn ashyp, tabys tabýǵa nıetti. Biraq, aýyldyq jerlerde úlken problema bar. Birinshiden, ekinshi deńgeıli bankter aýyldyq jerlerge esh ýaqytta nesıe bermeıdi. Ekinshiden, sol aýyldyq jerlerdegi jer ýchaskelerin, saman úılerdi kepildeme retinde almaıdy», - dedi vıtse-mınıstr.
Onyń atap ótýinshe, osyǵan baılanysty ótken jyly «Nátıjeli jumyspen qamtý jáne jappaı kásipkerlikti damytý» baǵdarlamasy iske asyra bastap, oǵan 30 mlrd teńge qarajat bólindi.
«2017 jyldyń nátıjesin qarasaq onyń ekonomıkamyz úshin tıimdiligi óte úlken boldy. Aýyl azamattary úshin óte mańyzdy baǵdarlamaǵa aınalyp úlgerdi. Tipti bólingen qarajat jetkiliksiz bolyp qaldy. Máselen, ótken jyly 15 myńdaı aýyl turǵyny «Bastaý bıznes» baǵdarlamasy boıynsha kiásipkerliktiń negizderin oqydy. Biraq, sonyń 5 myńdaıy qarajat ala almady. Olardyń yntasy bar, bıznespen aınalysqysy keledi», - dedi ol.
