Bıyl 1378 qandasymyz elge oralyp, soltústik oblystarǵa qonystanady
Qandastardyń 500-i - Pavlodar oblysyna, 350-i - Qostanaı oblysyna, 258-i - Aqmola oblysyna, 150-i - Shyǵys Qazaqstan oblysyna, 120-sy - Soltústik Qazaqstan oblysyna kóship kelmek. Óńirler boıynsha bólingen kvota sany osyndaı. Kvota sany ótken jylmen salystyrǵanda azyraq. Máselen, 2019 jyly 2 myń 31 óńirlik kvota bekitilgen.
Azamattardy halyq sany az óńirlerge ornalastyrý maqsatynda Úkimet 2016 jyldyń 18 aqpanynda oralmandar men qonys aýdarýshylardy qonystandyrý úshin óńirlerdi aıqyndaý týraly qaýly qabyldaǵan.
Qandastarymyzǵa atalǵan óńirlerge qonystanýyna baılanysty materıaldyq kómek beriledi. Otbasynyń árbir múshesine 35 AEK nemese 92 myń 800 teńge birjolǵy tólem tólenedi. Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıteti Kóshi qon qyzmetin monıtorıngileý basqarmasynyń basshysy Dastan Aıtqulovtyń aıtýynsha, turǵyn úıdi jalǵa alý, sondaı-aq, kommýnaldyq qyzmetterdi tóleý boıynsha shyǵystardy jabý úshin 12 aı ishinde otbasyna 15-ten 30 AEK nemese 6 myń 100-den 72 myń 200 teńge kóleminde qarjy tólenedi.
Ulttyq qoǵamdyq senim keńesiniń múshesi, aqyn Aýyt Muqıbektiń sózinshe, oralmandarǵa óńirlik kvota bólý - quptarlyq jaıt, alaıda tetikteri áli de jetildirýdi qajet etedi.
Eńbek jáne halyqty áleýmettik qorǵaý mınıstrliginiń aqparatynsha, byltyr 17 myń 661 azamat tarıhı otanyna oralyp, oralman mártebesin alǵan. Jalpy táýelsizdik jyldary elge 1 mln 57 myń 280 etnıkalyq qazaq oralǵan.
