Bıyl 130 Balqash turǵyny baspanaly bolady

BALQASh. QazAqparat – Balqashta «Nurly jer» baǵdarlamasy aıasynda páterler qurylysy jalǵasýda. Bıyl 18 myń sharshy metr paıdalanýǵa beriledi. 130 adam turǵyn úı alady, dep habarlaıdy QazAqparat tilshisi.

Óńirlik kommýnıkatsııalar qyzmeti alańynda ótken brıfıngide Balqash qalasynyń ákimi Oraz Taýrbekov turǵyn úı qurylysynyń qarqyny týraly aıtyp berdi.

«Ótken jyly qurylys qarqyny artty. 2019 jylmen salystyrǵanda 2,5 ese kóp sharshy metr paıdalanýǵa berildi. 120-dan astam turǵyn óz páteriniń kiltin aldy», - dedi qala ákimi.

10-shaǵyn aýdanda 45 páterli eki turǵyn úı salyndy. Jeke ınvestorlar 30 páterlik jáne 2 páterlik úı saldy. Jeke turǵyn úı qurylysyna bes myń sharshy metrden astam jer bólindi.

Bıyl «Nurly jer» baǵdarlamasy aıasynda 130 balqashtyq baspanaly bolady. Az qamtylǵan jáne kóp balaly otbasylar úshin 42 páterdi jalǵa alýǵa qarajat bólindi.

«Samal» shaǵyn aýdanynyń ınjenerlik-kommýnıkatsııalyq ınfraqurylymyn jańǵyrtýǵa qarjy salyndy. Jaqsartylǵan jeliler 320 jer ýchaskesi men eki bilim berý mekemesine ótkiziledi.

Jer telimderin bólý jalǵasýda. Bıyl olardy kezekte turǵan 100 adam alady.