Bıyl 13 myńnan astam etnıkalyq qazaqqa qandas mártebesi berildi

ASTANA. QazAqparat - 2022 jyldyń basynan beri 13 myńnan astam etnıkalyq qazaq qandas mártebesin aldy. Bul týraly QR Eńbek jáne halyqty áleýmettik qorǵaý mınıstrliginen málim etti, dep habarlaıdy QazAqparat.

«2022 jylǵy 1 qazandaǵy jaǵdaı boıynsha 13 362 etnıkalyq qazaq tarıhı otanyna oralyp, qandas mártebesin aldy. 1991 jyldan bastap respýblıkaǵa barlyǵy 1 mln 101,2 myń etnıkalyq qazaq oraldy», - delingen málimette.

Bıyl Qazaqstanǵa kelgen qandastardyń jartysynan astamy (68,7%) Ózbekstannan, 10% – QHR-dan, 7,9% – Túrikmenstannan, 4,6% – Mońǵolııadan jáne 8,8% - basqa elderden kelgen. Olar negizinen Almaty (29,9%), Mańǵystaý (16,7%), Túrkistan (9%) jáne Jambyl (6,5%) oblystarynda, sondaı-aq Astana (7,8%), Shymkent (7,3%) jáne Almaty (5,8%) qalalarynda qonystandy.

«Osy jylǵy 1 qazandaǵy jaǵdaı boıynsha eńbekke qabiletti jastaǵy etnıkalyq qonys aýdarýshylardyń sany 58,9%, eńbekke qabiletti jastan kishi adamdar 27,5% jáne zeınetkerler 13,7% quraıdy.

Eńbekke qabiletti jastaǵy qandastardyń bilim deńgeıi boıynsha 13,2% - joǵary bilimdi, 38,9% - arnaıy orta bilimdi, 46% - jalpy orta bilimdi jáne 1,8% - bilimi joq», - dep naqtylady mınıstrlikten.

Foto: gov.kz