Bıyl 13 myńnan astam almatylyq «Baqytty otbasy» ortalyqtaryna júgingen

ALMATY. QazAqparat- Qala turǵyndarynyń basym bóligi ortalyqtardyń arqasynda jumys tapty. Sonymen qatar 1500-den astam adam demeýshilerden materıaldyq qoldaý aldy. Bul týraly Almaty qalasy «Baqytty otbasy» ortalyǵynyń jetekshisi Zýlfııa Baısaqova aıtty, dep habarlaıdy QazAqparat tilshisi.

«Bizdiń ortalyqtar kópbalaly otbasylarǵa barynsha qoldaý kórsetedi. Jumysqa ornalasýǵa kómektesemiz. Sonymen qatar, biz otbasylyq qundylyqtardy dáripteımiz. «Baqytty otbasy» ortalyqtarymen qatar dástúrli qolónerdi damytý ortalyǵy jumys isteıdi, onda myńdaǵan adam oqytý kýrstarynan ótti, myńnan astam áıel óz isin ashýǵa jáne damytýǵa: tigin sheberhanalaryn, aspazdyq, baspahanalardy, sulýlyq stýdııalaryn ashýǵa jáne damytýǵa óteýsiz granttar aldy», - dedi Zýlfııa Baısaqova.

Aıta ketsek, ortalyqtarǵa tek kópbalaly analar ǵana emes, sonymen qatar dombyra oınaýdy, akterlik sheberlikti, bıdi, qolónerdi úırenetin balalar da barady. Sondaı-aq balalarǵa orys jáne aǵylshyn tilderi, vokal, horeografııa boıynsha kýrstar qoljetimdi.

«Budan basqa, «Baqytty otbasy» ortalyqtary halyqtyń áleýmettik jaǵynan osal toptaryna kómek kórsetedi, olardy túrli baǵyttar boıynsha oqytady: aǵylshyn tili, kompıýterlik saýattylyq, tigin isi, bıznes-josparlaý, kıim dızaıny, kásipkerlik, býhgalterııa, aspazdyq, kıiz basý, kirpikti uzartý, manıkıýr, vızaj, shashtaraz qyzmetteri, pishý jáne tigý, SMM-marketıng, kıim dızaıny, uıaly telefondardy jóndeý, kondıter, aspaz jáne taǵy basqalary. Jyl basynan kýrsty 1611 adam aıaqtady. Bıyl 13 myńanan astam almatylyq ortalyqqa júgindi»,- deıdi ol.

Eske salsaq, muqtaj otbasylardyń ómir súrý sapasyn arttyrýǵa baǵyttalǵan «Baqytty otbasy» ortalyǵy qalanyń ár aýdanynda 2019 jyldyń tamyz aıynan bastap jumys isteıdi.

Qazir olardyń sany toǵyzǵa jetti.

Búginde Almatyda 32 278 kópbalaly otbasy turady, onyń ishinde 5001 adam «Altyn alqa» jáne «Kúmis alqa» alqalarymen marapattaldy.