Bıyl 12 elde qazaq tilin úıretetin 31 onlaın-synyp ashý kerek - Dáýren Abaev

NUR-SULTAN. QazAqparat - Bıyl 12 elde 31 qazaq tilin úıretý onlaın-synyptaryn ashý kerek. Bul týraly búgin QR Aqparat jáne qoǵamdyq damý mınıstrliginiń keńeıtilgen alqa otyrysynda vedomstvo basshysy Dáýren Abaev aıtty, dep habarlaıdy QazAqparat tilshisi.

«Qandastardy qoldaýdy odan ári jalǵastyrý maqsatynda bıyl áleýmettik-ekonomıkalyq qoldaý sharalary kesheniniń naqty paıymdaýyn jasaý kerek. Birinshiden, Otandastar forýmyn jáne Sheteldegi qazaqtardyń kishi quryltaıyn joǵary deńgeıde ótkizý qajet. Ekinshiden, 12 elde 31 qazaq tilin úıretý onlaın-klastaryn jáne keminde 7 elde qazaq mádenı-iskerlik úılerin ashý kerek», - dedi mınıstr.

Dáýren Abaev úshinshiden, «qandastar» mártebesin bir tereze prıntsıpi boıynsha berýge arnalǵan qyzmetti iske qosý qajettigin aıtty.

«Vıtse-mınıstr Marat Ázilhanovqa bıyl konfessııaaralyq jáne etnıkaaralyq qatynastar salasyndaǵy barlyq mindetterdiń sapaly oryndalýyn qamtamasyz etýdi tapsyramyn», - dedi ol.