Bıyl 1100 shaqyrym temirjol jóndeýden ótedi

ASTANA. QazAqparat – Temirjol qatynasy qaýipsizdigin qamtamasyz etý maqsatynda bıyl elimizde 1 myń shaqyrymnan astam temirjol jelisi jóndeýden ótedi. Bul týraly Indýstrııa jáne ınfraqurylymdyq damý mınıstri Marat Qarabaev málim etti, dep habarlaıdy QazAqparat tilshisi.

«Elimizde jalpy uzyndyǵy 16 myń shaqyrym temirjol bar. Jyl saıyn 500 shaqyrym temirjolǵa jóndeý júrgiziledi. Bıyl ol kórsetkish eki ese artyp, 1100 shaqyrym temirjol jóndeýden ótedi. Bul jerde basty másele qaýipsizdikti qamtý. Ózderińiz bilesizder, qystygúni poıyz relsten shyǵyp ketetin jaǵdaılar bolyp jatady. Sondyqtan jóndeýdi jazda júrgizip úlgerý kerek», - dedi Marat Qarabaev Úkimet otyrysynan keıin tilshilerdiń suraǵyna jaýap bere turyp.

Odan bólek, BAQ ókilderi mınıstrden poıyz keshikken jaǵdaıda jolaýshylarǵa jeńildik jasalýy múmkin be degen saýal qoıdy.

«ol jaǵy qarastyrylmaıdy», - dep qysqa qaıyrdy vedomstvo basshysy.

Buǵan deıin Marat Qarabaev kómir tapshylyǵyna qatysty másele kóterip, kásipkerler halyqqa arnalǵan kómirdi shetelge satyp jatqanyn aıtqan edi.